نئی دہلی: ابھی سوشانت سنگھ راجپوت کی خودکشی کی گتھی سلجھی بھی نہیں تھی کہ اداکارہ وجے لکشمی کی جانب سے ہراساں کئے جانے کے باعث اقدام خودکشی کی خبر نے سب کو افسردہ کردیا۔
میڈیا خبروں کے مطابق تامل شوبز انڈسٹری کی مقبول اداکارہ وجے لکشمی کی جانب سے اپنی زندگی کے خاتمے کی کوشش کی خبر نے سب کو پریشان کردیا اور لوگ اداکارہ کو ہراساں کرنے والی بااثر شخصیات کی گرفتاری کا مطالبہ کر رہے ہیں۔
رپورٹ کے مطابق نوجوان مقبول تامل اداکارہ نے خودکشی کی کوشش سے قبل اپنے فیس بک اکاؤنٹ پر چند ویڈیوز شیئر کرکے سنگین قدم اٹھانے کی وضاحت کی اور بتایا کہ کس طرح ان کی زندگی مصیب اجیرن کر دی گئی۔
رپورٹ کے مطابق اداکارہ نے اپنی ایک ویڈیو میں تامل ناڈو کی مقامی سیاسی جماعتوں کے دو اہم رہنماؤں پر ہراساں کیے جانے کے الزامات عائد کیے۔وجے لکشمی نے اپنی ویڈیو میں بتایا کہ دونوں سیاسی رہنماؤں نے نہ صرف میڈیا میں ان کی تضحیک کی بلکہ وہ انہیں آن لائن ہراساں بھی کرتے رہے ہیں۔
اداکارہ نے الزام عائد کیا کہ دونوں بااثر رہنماؤں کی جانب سے ہراساں کیے جانے کی وجہ سے وہ شدید ذہنی تناؤ میں مبتلا ہوگئیں، جس وجہ سے اب وہ اپنی زندگی کا خاتمہ کرنے جا رہی ہیں۔
انڈیا ٹوڈے کے مطابق وجے لکشمی نے ایک اور ویڈیو میں بتایا کہ انہوں نے بلڈ پریشر کم کرنے والی گولیاں کھائی ہیں، جس کے بعد اب ان کا بلڈ پریشر انتہائی کم ہوجائے گا، جس کے بعد ان کی موت واقع ہوجائے گی۔
ساتھ ہی اداکارہ نے ویڈیو میں حکومت، انتظامیہ اور عوام سے اپیل کی کہ انہیں ہراساں کرنے والے سیاسی رہنماؤں کے خلاف ایسی کارروائی کی جائے کہ ان کی خودکشی مثال بن جائے۔اخبار کے مطابق اداکارہ کی ویڈیو وائرل ہونے کے بعد موقع پر انہیں گھر سے ہسپتال منتقل کیا گیا اور اب چنئی کے ایک نجی ہسپتال میں ان کا علاج کیا جا رہا ہے۔
تازہ رپورٹس کے مطابق اداکارہ کی حالت خطرے سے باہر ہے، تاہم اب بھی وہ ہسپتال میں زیر علاج ہیں اور مزید ایک یا دو دن تک انہیں ہسپتال میں رکھے جانے کا امکان ہے۔
