اسلام آباد: پاکستان مسلم لیگ نواز (پی ایم ایل این ) کی نائب صدر مریم نواز اور ان کے شوہر ریٹائرڈ کیپٹن محمد صفدر منگل کے روز اسلام آباد ہائی کورٹ میں پیش ہو گئے۔
جسٹس عامر فاروق اور جسٹس محسن اختر کیانی پر مشتمل ایک ڈویژن بنچ سابق وزیر اعظم میاں محمد نواز شریف ، ان کی بیٹی مریم نواز اور ان کے شوہر صفدر کی ایون فیلڈ ریفرینس میں اپنی سزا کے خلاف اپیلوں کی سماعت کر رہی ہے۔
بنچ فلیگ شپ ریفرنس میں نواز شریف کی بریت کے خلاف قومی احتساب بیوروکی جانب سے داخل اپیل نیز العزیزیہ ریفرنس میں ان کی سزا کے خلاف اپیلوں کی بھی سماعت کرے گی۔مریم مری سے اسلام آباد پہنچیں۔ وہ جب بھرا کہو پہنچیں توسیکڑوں پارٹی کارکنوں اور حامیوں نے نعروں کی گونج اور گلاب کی پتیوں کی بارش سے ان کا والہانہ استقبال کیا ۔
متعدد پی ایم ایل این کارکن ہائی کورٹ تک مریم کے ساتھ گئے۔ مریم کے ہمراہ پارٹی کے دیگر رہنما پرویز رشید اور شاہد خاقان عباسی بھی تھے۔سماعت سے قبل میڈیا سے بات کرتے ہوئے مریم نے کہا کہ صرف کل جماعتی اجلاس ہی انکشاف کرے گا کہ پی پی پی پی ایم ایل این کے ساتھ ہے یا نہیں ۔
تاہم انہوں نے مزید کہا کہ پی پی پی اجلاس میں ضرور شرکت کرے گی۔انہوں نے کہا کہ حکومت کے خلاف کارروائی کرنے کے لیے حزب اختلاف کی جماعتوں کو متحد ہونا پڑے گا۔
انہوں نے نواز شریف کی صحت پر بھی تبصرہ کیا ”اس عمر میںکوئی بھی ملک سے باہر رہنا پسند نہیں کرتا ، نواز کا علاج جاری ہے لیکن کوروناوائرس کی وجہ سے تاخیر ہو رہی ہے۔“
انہوں نے مزید کہا کہ وہ تو یہ چاہتی ہیںکہ ان کے والد اپنا مکمل علاج کرائیں اور پاکستان واپس نہ آئیں” لیکن ان کی حالت جانتے ہوئے میں وثوق کے ساتھ یہ کہہ سکتی ہوں کہ وہ پاکستان سے باہر نہیں رہیں گے۔“
