تہران: ایران کے سینٹرل بنک کے گورنرن عبد الناصر ہمتی نے کہا ہے کہ امریکی اقتصادی پابندیوں کے باعث کورونا وائرس کی دوا خریدنے کے لیے رقم کی منتقلی کی کوششیں ناکام ہو گئیں۔
انہوں نے کہا کہ ان پابندیوں نے ایران کو عالمی صحت تنظیم کے توسط سے کورونا ویکسین خریدنے کے لئے رقم کی ادائیگی سے روک دیا ہے ۔بنک کے گورنر عبدالناصر نے پیر کو انسٹا گرام پر لکھا ”چونکہ کورونا وائرس ویکسین کی خریداری کوواکس اور عالمی صحت تنظیم کے معرفت کرنی ہوگی۔
امریکی حکومت کی غیر انسانی پابندیوں اور غیر ملکی اثاثہ کنٹرول کے دفتر (امریکی محکمہ خزانہ) سے اجازت حاصل کرنے کی ضرورت کے سبب اب تک ضروری فنڈز کی منتقلی کے لئے ہماری تمام کوششوں میں رکاوٹ پیدا کردی ہے۔“
انہوں نے کہا کہ امریکہ کے دباؤ اور دھمکیوں کی وجہ سے بین الاقوامی مالیاتی فنڈ نے ایران کو انسانی قرض دینے سے انکار کردیا ہے۔ اس کے باوجود ایران فنڈ منتقل کرنے کے دیگر ذریعہ اور ویکسین حاصل کرنے کے متبادل راستے تلاش کرنے کی کوشش کررہا ہے۔
انہوں نے کہا ”وزارت صحت دیگر ممالک سے ویکسین خریدنے کے معاملے پر بات چیت کررہا ہے۔ ایک ملکی کورونا وائرس ویکسین تیار کرنے کے بارے میں خبریں حوصلہ افزا ہے“۔
انہوں نے سوشل میڈیا کے توسط سے مزید کہا کہ ڈونالڈ ٹرمپ کا امریکہ جس وقت یہ کہتا ہے کہ اس کی جارحانہ پابندیوں سے غذا اور ادویات جیسی درآمدات مستثنیٰ ہیں تو یہ اس کا سب سے بڑا جھوٹ اور فریب ہے اور وہ دنیا کو دھوکا دے رہا ہے۔
