مہاراشٹر:(اے یو ایس)مہاراشٹر کے جلگاو¿ں میں آج صبح ایک دردناک سڑک حادثہ پیش آیا ، جس میں 15 مزدوروں کی موت ہوگئی۔ جلگاوں کے یاول کے پاس پپیتے سے بھرا ٹرک پلٹ گیا ، جس کی وجہ سے یہ حادثہ پیش آیا۔ پپیتے سے بھرا ٹرک دھولے سے راویل کی جانب جارہا تھا۔

حادثہ کی اطلاع ملتے ہی جائے واقعہ پر پہنچی پولیس نے لاشوں کو باہر نکالنے کا کام شروع کردیا ہے۔ حادثہ کی وجوہات کا ابھی تک کوئی پتہ نہیں چل سکا ہے۔اطلاعات کے مطابق جلگاو¿ں میں پیر کی صبح پپیتے سے بھرا ٹرک راویل کی جانب جارہا تھا۔ ابھی ٹرک یاول کے پاس پہنچا ہی تھا کہ بے قابو ہوکر پلٹ گیا۔

ٹرک پلٹتے ہی چیخ وپکارسن کرآس پاس کے لوگ مدد کیلئے دوڑ پڑے۔عینی شاہدین کے مطابق ٹرک میں کچھ مزدور بھی بیٹھے تھے۔ حادثہ اتنا بھیانک تھا کہ ٹرک میں موجود سبھی 15 مزدوروں کی جائے واقعہ پر ہی موت ہوگئی۔ حادثہ کی اطلاع ملتے ہی جائے واقعہ پر پہنچی پولیس نے مقامی لوگوں کی مدد سے مزدوروں کو ٹرک سے باہر نکالا۔

ابتدائی جانچ سے پتہ چلا ہے کہ ڈرائیور کو جھپکی آگئی تھی ، جس کی وجہ سے یہ حادثہ پیش آیا۔ پولیس نے لاشوں کو قبضہ میں لے کر پوسٹ مارٹم کیلئے بھیج دیا ہے۔