نئی دہلی: بجٹ اجلاس کے دوسرے مرحلے میں پیر سے شروع ہوئے بجٹ اجلاس کے دوران دونوں ایوانوں میں زبردست ہنگامہ آرائی ہوئی اور کئی بارلوک سبھا اور راجیہ سبھا دونوں کی کارروائی ملتوی کرنا پڑی۔ پیر کے روز جیسے ہی راجیہ سبھا کی کارروائی شروع ہوئی کانگریس کی سربراہی میں اپوزیشن ارکان نے مختلف پٹرولیم مصنوعات کی قیمتوں میں اضافے کے بارے میں ہنگامہ آرائی شروع کردی۔ جس کی وجہ سے ایوان بالا کا اجلاس تقریبا ایک گھنٹہ کے لئے ملتوی کردیا گیا۔ بعد میں ہنگامہ نہ رکنے پر چیئرمین نے دوپہر 1 بجے تک ایوان کو ملتوی کردیا۔

واضح ہو کہ کانگریس نے پیر کو یہ الزام لگایا کہ مرکزی حکومت پارلیمنٹ میں پٹرول ، ڈیزل اور کھانا پکانے کے ایندھن کی قیمتوں میں اضافے کے معاملے پر بات کرنے کے لئے تیار نہیں ہے۔ لوک سبھا میں حزب اختلاف کی ہنگامہ آرائی کے بعد ایوان کی کارروائی دن بھر کے لیے ملتوی کر دی گئی۔قائد حزب اختلاف کے قائد ملیکارجن کھڑگے نے کہا کہ پارلیمنٹ میں افراط زر کے معاملے پر تبادلہ خیال کے لئے کانگریس حکومت پر دباؤ ڈالتی رہے گی۔

انہوں نے پارلیمنٹ ہاوس کے باہر نامہ نگاروں کو بتایا کہ راجیہ سبھا میں ، ہم نے قاعدہ 267 کے تحت نوٹس دیا تھا کہ ملک میں پٹرول ، ڈیزل اور کھانا پکانے گیس کی قیمتوں میں روز بروز اضافہ ہورہا ہے اور اس سے عام لوگوں کو بہت پریشانی کا سامنا کرنا پڑ رہا ہے۔ اس طرح کی صورتحال میں اس پر تبادلہ خیال کیا جانا چاہئے۔ کانگریس کے رکن پارلیمنٹ کھڑگے نے کہا کہ ہم ایوان میں ان امور پر تبادلہ خیال کرنا چاہتے ہیں ، لیکن حکومت اس کے لئے تیار نہیں ہے۔

ہمیں ان امور کو اٹھانے اور بحث کے لئے وقت دیا جانا چاہئے۔ دریں اثنا ، چار ریاستوں اور ایک مرکزی علاقوں میں ہونے والے اسمبلی انتخابات کا حوالہ دیتے ہوئے ترنمول کانگریس نے پارلیمنٹ کے بجٹ اجلاس کے دوسرے مرحلے کو ملتوی کرنے کا مطالبہ کیا۔