صنعا: (اے یوایس ) یمن میں عرب اتحاد نے ایرانی حمایت یافتہ حوثی ملیشیا کی طرف سے حملوں کے لیے تیار کیے گئے دو بمبار ڈرون اور بارود سے لدی دو کشتیاں تباہ کردیں۔
یہ ڈرون طیارے اور بارودی کشتیاں الحدیدہ میں ایک کارروائی کے دوران تباہ کی گئیں۔یمن میں آئینی حکومت کے دفاع کے لیے لڑنے والے عرب اتحاد کی طرف سے جاری کردہ ایک بیان میں کہا گیا ہے کہ حوثی باغی اسٹاک ہوم معاہدے کو الحدیدہ گورنری میں حملوں، عالمی اور علاقائی جہاز رانی کو خطرے میں ڈالنے کے لیے استعمال کررہے ہیں۔
قبل ازیں عرب اتحاد نے سعودی عرب کے جنوب میں حوثیوں کے دو بمبار ڈرون طیارے تباہ کرنے کا دعویٰ کیا تھا۔ادھر یمن کے لیے امریکا کے خصوصی ایلچی ٹیم لنڈر کنگ نے اپنی تعیناتی کے دو ماہ کے عرسے میں خلیجی ممالک کا تیسرا دورہ کیا ہے۔معاصر عزیز عرب روزنامہ ‘ الشرق الاوسط’ کے مطابق امریکی مندوب نے خلیجی ممالک کے دورے کا آغاز مسقط سے کیا ہے۔
ان کے اس دورے میں دیگر اہم موضوعات میں یمن کے لیے سعودی عرب کے امن اقدام پر تفصیل سے بات چیت کی جائے گی۔گذشتہ روز امریکی مندوب نے سلطنت عمان کے وزیر خارجہ بدر بن حمد البوسعیدی اور یمن کے لیے اقوام متحدہ کے مندوب مارٹن گریفیتھس سے ملاقات کی۔
