اسٹاک ہوم:(اے یو ایس )دنیا بھر میں گذشتہ سال کورونا وائرس کی وبا پھیلنے کے باوجود عالمی فوجی اخراجات میں2.6صد کی شرح سے اضافہ ہوا ہے اور یہ 19کھرب 8 ارب ڈالرز تک جا پہنچے ہیں۔سویڈن کے دارالحکومت اسٹاک ہوم میں قائم بین الاقوامی امن ریسرچ انسٹی ٹیوٹ (سِپری) کی سوموار کو جاری کردہ رپورٹ میں بتایا گیا ہے کہ دنیا بھر میں پانچ ممالک امریکا ، چین ، بھارت ،روس اور برطانیہ نے 2020 میں سب سے زیادہ فوجی اخراجات کیے ہیں۔دنیا بھر میں کل دفاعی اخراجات میں ان ممالک کا حصہ 62 فی صد ہے۔
سپری کے محقق ڈیاگو لوپس ڈی سلوا کا کہنا ہے:”ہم پورے یقین کے ساتھ یہ کہہ سکتے ہیں کہ کرونا وائرس کی وبا نے 2020 کے دوران میں عالمی فوجی اخراجات پر کوئی نمایاں اثر نہیں چھوڑاہے۔“کوویڈ-19 کی وبا کی وجہ سے عالمی جی ڈی پی میں تو کمی واقع ہوئی ہے مگر جی ڈی پی کے مقابلے میں فوجی اخراجات میں اضافہ ہوا ہے اور 2020 میں اس کی اوسط شرح2.4فی تک پہنچ گئی تھی جبکہ 2019 میں یہ شرح 2.2 فی صد رہی ہے۔تاہم بعض ممالک نے اپنے دفاعی بجٹ کا ر±خ کرونا کی وبا سے نمٹنے کے لیے اقدامات کی جانب موڑدیا تھا۔ان میں چلّی اور جنوبی کوریا نمایاں ہیں۔البتہ برازیل اور روس ایسے بعض ممالک نے 2020 میں اپنے مختص کردہ فوجی بجٹ میں سے کم رقوم خرچ کی ہیں۔
گذشتہ سال امریکا کے فوجی اخراجات 778 ارب ڈالر تک پہنچ گئے تھے۔یہ رقم 2019 کے دفاعی بجٹ کے مقابلے میں4.4 فی صد زیادہ تھی۔امریکا دنیا بھر میں دفاع پر سب سے زیادہ رقوم صرف کرتا ہے۔2020 میں کل عالمی فوجی اخراجات میں اس کا حصہ 39 فی صد تھا۔امریکا نے گذشتہ مسلسل تین سال کے دوران میں اپنے فوجی اخراجات میں اضافہ کیا ہے جبکہ اس سے پیوستہ سات سال کے دوران میں اس مد میں اخراجات میں کمی تھی۔چین دنیا میں دفاع پر سب سے زیادہ رقوم خرچ کرنے والا دوسرا بڑا ملک ہے۔2020 میں اس نے دفاع پر کل 252 ارب ڈالر خرچ کیے تھے۔گذشتہ سال کے دفاعی بجٹ کے مقابلے میں اس کے یہ اخراجات9.1 فی صد زیادہ تھے۔ چین کے فوجی بجٹ میں گذشتہ 26 سال سے مسلسل اضافہ ہورہا ہے۔سپری کے ڈیٹابیس کے مطابق چین دنیا کا واحد ملک ہے جس کے فوجی اخراجات میں گذشتہ ربع صدی سے مسلسل اضافہ ہوتا چلا آرہا ہے۔
