نئی دہلی: کانگریس کی صدر سونیا گاندھی نے کورونا سے نمٹنے کے لئے متحد ہوکر کام کرنے کی اپیل کرتے ہوئے کہا ہے کہ حکومت کو وبا کے خلاف تمام سیاسی جماعتوں کی رضامندی سے قومی پالیسی بنانی چاہئے۔ سونیا گاندھی نے جاری ایک ویڈیو پیغام میں کہا کہ اس وبا سے متحد ہوکر ہی نمٹا جاسکتا ہے اور اس لئے جہاں تک ممکن ہو ایک دوسرے کی مدد کرنی چاہئے۔
مرکز اور ریاستی حکومتوں کے لئے یہ وقت بیدار ہونے اور فرض کی ادائیگی کا ہے ، اس لئے کسی تفریق کے بغیر متاثرین کی مدد کی جانی چاہئے۔انہوں نے کہا کہ کورونا کا سب سے سنگین اثر غریبوں پر پڑ رہا ہے۔ ملک کا ہر غریب وبا کی وجہ سے بحران میں آگیا ہے۔ مرکز اور ریاستی حکومت کی ذمہ داری مزدوروں کی ہجرت روکنا اور انہیں مناسب مدد پہنچانا ہے۔
