Court refuses to hear Saiful Islam Gaddafi appeal against disqualification

طرابلس:(اے یو ایس ) لیبیا کے سابق مقتول صدر معمرقذافی کے صاحب زادے سیف الاسلام قذافی نے کہا ہے کہ عدالتی حکام نے 24 دسمبر کو ہونے والے صدارتی انتخابات میں حصہ لینے کے لیے ان کے کاغذات نامزدگی مسترد کرنے کے خلاف اپیل کی سماعت سے انکار کردیا ہے۔لیبیا کے ہائی نیشنل الیکشن کمیشن نے ان کے کاغذات نامزدگی مسترد کردیے ہیں اور کہا ہے کہ وہ صدارتی انتخاب لڑنے کے اہل نہیں ہیں۔انھوں نے اس فیصلے کے خلاف اپیل دائرکی تھی لیکن حکام نے اس کی سماعت سے انکارکردیا ہے۔

سیف الاسلام قذافی کے وکیل خالدالغویل نے العربیہ کو بتایا کہ الیکشن کمیشن کا فیصلہ صدارتی انتخابات کے قانون کی دفعہ 10 پر مبنی تھا لیکن یہ خود قانونی خلاف ورزی ہے اوراس کا اطلاق ان کے مؤکل پر نہیں ہوتا کیونکہ سیف قذافی کے مجرمانہ ریکارڈ کے ثبوت کے طور پر ان کوئی بھی جرم پیش کیا گیا ہے اور نہ ان کے خلاف کسی عدالت نے انھیں کسی جرم میں قصور وارقرار دے کر کوئی فیصلہ جاری کیا تھا۔انھوں نے یہ بھی اشارہ دیا کہ سیف قذافی کی نااہلی کے خلاف اپیل انتخابی عذرداریوں سے متعلق عدالتی کمیٹیوں کے پاس جمع کرائی جائے گی اور ان کے مؤکل کے بہ طور صدارتی امیدواراخراج کو”سیاسی فیصلہ“ثابت کیاجائے گا۔

الغویل نے مزید کہا کہ جنگ ابھی جاری ہے اور لیبیا کے باشندے اپنے امیدوار کے انتخاب لڑنے کے حق کے لیے پوری طاقت کے ساتھ جدوجہد کریں گے اور ان کابطور صدارتی امیدوار دفاع کریں گے۔