Russian journalist Dmitry Muratov auctions Nobel medal for $103m

ماسکو: (اے یو ایس ) کیا امن کی قیمت لگانا ممکن ہے؟شاید اس بات کا کسی حد تک جواب روسی صحافی دمتری موراتوو کے پاس موجود ہے، جو یوکرین جنگ میں در بدر ہو جانے والے بچوں کی مددکے لیے اپنے نوبیل انعام کی نیلامی کر رہے ہیں۔اس عمل سے ملنے والی تمام رقم اقوام متحدہ کے ادارے برائے اطفال، یونیسیف کو عطیہ کی جائے گی۔وہ نوبیل میڈل کے ساتھ ملنے والی پانچ لاکھ ڈالر کی انعامی رقم عطیہ کرنے کا پہلے ہی اعلان کر چکے ہیں۔

دمتری کو پچھلے سال اکتوبر میں ان کی صحافتی کاوشوں پر نوبیل انعام دیا گیا تھا۔انہوں نے روسی اخبار ‘نووایا گزیٹا’ شروع کرنے میں مدد دینے کے علاوہ وہاں بطور چیف ایڈیٹر فرائض بھی انجام دیے۔ تاہم یوکرین پر حملے کے بعد روس نے حکومت مخالف اخباروں اور صحافیوں پر پابندیاں عائد کیں تو اِس اخبار کو بھی بند کر دیا گیا۔خبر رساں ادارے، ای پی کو انٹرویو میں دمتری نے بتایا کہ ا±نہیں یوکرین جنگ میں بالخصوص یتیم ہوجانے والے بچوں پر بہت تشویش ہے، اور وہ ان کا مستقبل لوٹانا چاہتے ہیں۔ان کے طلائی میڈل کو امریکی ہیری ٹیج آکشنز میں نیلام کیا جائے گا۔، تاہم یہ نیلام گھرحاصل ہونے والی رقم کا کوئی حصہ نہیں لے گا۔

اِس میڈل کیلئے آن لائن بولیاں یکم جون یعنی بچوں کے عالمی دن سے لگنی شروع ہوئی تھیں اور امید کی جا رہی ہے کہ جیتنے والی بولی لاکھوں ڈالرمیں ہوگی۔ ایک سو پچتہر گرام وزنی33 کیریٹ سونے کے اِس میڈل کی اصل قیمت تقریبا دس ہزار ڈالر ہے۔اس سے قبل کسی بھی نوبیل انعامی میڈل کی سب سے بڑی بولی دو ہزار چودہ میں لگی تھی، جب ڈی این اے کی ساخت دریافت کرنے والے سائنسدان، جیمز واٹسن نے اپنا طلائی میڈل چالیس لاکھ سے زائد ڈالر میں بیچا تھا۔دمتری پر امید ہیں کہ اِس نیلامی سے متاثر ہو کر دیگر افراد بھی یوکرینی عوام کی مدد کے لیے اپنی قیمتی اشیا نیلام کریں گے۔