Biden signs ratification documents approving NATO membership for Finland and Sweden

واشنگٹن: (اے یو ایس ) امریکی صدر جو بائیڈن نے زور دے کر کہا ہے کہ فن لینڈ اور سویڈن کا نیٹو میں شمولیت کا فیصلہ ہمارے اتحاد کے لیے ایک اہم لمحہ ہے۔ بائیڈن نے منگل کو اپنے ٹویٹر اکاؤنٹ پر ایک ٹویٹ میں کہا کہ فن لینڈ اور سویڈن کے الحاق سے عالمی استحکام کی ضمانت کو مضبوط بنانے میں مدد ملے گی۔انہوں نے مزید کہا کہ فن لینڈ اور سویڈن ناٹو کو مزید مضبوط بنائیں گے۔قبل ازیں صدر بائیڈن نے سویڈن اور فن لینڈ کو ناٹو میں شمولیت کے بل پر دستخط کئے۔

اس موقعے پر انہوں نے کہا کہ امریکہ کی جانب سے فن لینڈ اور سویڈن کی نیٹو میں شمولیت کی درخواستوں کی توثیق قابل تحسین ہے۔ یہ ایک ایسا قدم ہے جو یوکرین میں روسی فوجی کارروائی کے جواب میں مغربی اتحاد کو وسعت دے گا۔بائیڈن نے کہا کہ دو شمالی یوروپی ممالک امریکا کی زیر قیادت ٹرانس اٹلانٹک اتحاد میں باہمی دفاع کے لیے مقدس عہد کرتے ہوئے مضبوط اور قابل اعتماد اتحادی بنیں گے۔

انہوں نے فن لینڈ اور سویڈن کی بھی تعریف کرتے ہوئے کہا کہ ان میں سے ہر ایک کے پاس “مضبوط جمہوری ادارے، ایک مضبوط فوج، اور ایک مضبوط اور شفاف معیشت” ہے جو نیٹو کو مضبوط کرے گی۔انہوں نے کہا کہ ولادیمیر پوتین کے روس نے یوکرین میں آپریشن کے ساتھ یورپ میں امن اور سلامتی کوخطرے میں ڈالا۔ انہوں نے کہا کہ پوتین نے سوچا کہ وہ ہمیں تقسیم کر سکتے ہیں مگر اس کا الٹ ہو رہا ہے۔ ہم مزید متحد ہو رہے ہیں۔یہ بات قابل ذکر ہے کہ اس ماہ کے شروع میں سینیٹ نے ہیلسنکی اور اسٹاک ہوم کے نیٹو کے ساتھ الحاق کے حق میں ووٹ دیا تھا، جس سے امریکا اس اتحاد میں شامل 30 ممالک میں سے 23 واں ملک بن گیا تھا جو ان کی رکنیت کے لیے سرکاری سطح پرحمایت فراہم کرتا ہے۔