رملہ:(اے یو ایس )فلسطین کے مقبوضہ مغربی کنارے کے شمالی شہر طولکرم میں منگل کی صبح فائرنگ کے واقعہ میں ایک اسرائیلی فوجی ہلاک ہو گیا۔اسرائیلی فوج کے ترجمان اویچائی ادرعی نے پیر کو انکشاف کیا کہ ابتدائی تحقیقات سے ظاہر ہوتا ہے کہ مغربی کنارے کے شہر طولکرم کے قریب جو کچھ ہوا وہ فریق مخالف کی فائرنگ کا نہیں بلکہ اسرائیلی فوجی کی ہی اتفاقیہ گولی چل جانے کا نتیجہ تھا۔۔ادرعی نے اپنے ٹویٹر اکاؤنٹ پر بتایا کہ ابتدائی تحقیقات سے یہ واضح ہے کہ اس وقت بحث گولی چلانے کے بارے میں نہیں ہے تاہم ان کا کہنا تھا کہ فائرنگ کے حالات کا ابھی بھی جائزہ لیا جا رہا ہے۔

دریں اثنا العربیہ کے نامہ نگار نے اطلاع دی ہے کہ غلطی سے دو اسرائیلی فوجوں کے درمیان فائرنگ ہوئی اور اس میں ایک فوجی شدید زخمی ہو گیا جس نے بعد میں زخموں کی تاب نہ لا کر دم توڑ دیا ۔قبل ازیں اسرائیلی پولیس اور طبی عملے کے مطابق اتوار کی صبح وسطی یروشلم میں ایک بس پر مسلح حملے میں 8 افراد کے زخمی ہو گئے تھے۔ ان میں سے دو کی حالت تشویشناک بیان کی جاتی ہے۔اسرائیلی پولیس نے حملہ کرنے کے شبہ میں ایک شخص کو گرفتار کرنے کا اعلان کیا ہے۔ اس کے ترجمان کان ایلی لیوی نے پبلک ریڈیو کو بتایا کہ حملہ کے چند گھنٹے بعد یہ شخص ہمارے ہاتھ میں تھا۔دریں اثنا اسرائیلی وزیر اعظم یائر لپیڈ نے کابینہ کے ہفتہ وار اجلاس کو بتایا کہ حملہ آور اکیلا ہی تھا اور وہ القدس کا رہائشی ہے اور ماضی میں بھی ایسے حملے کر چکا ہے۔