نئی دہلی ،(اے یو ایس ) او ٹی ٹی پلیٹ فارموں پر ٹیلی کاسٹ کیے جارہے غیر مہذب مواد کے خلاف حکومت سخت قدم اٹھانے کی تیاری میں ہے۔ او ٹی ٹی پلیٹ فارم پر فحاشی اور گالی گلوج کی شکایت پر سخت موقف اختیار کرتے ہوئے مرکزی وزیر برائے اطلاعات و نشریات انوراگ ٹھاکر نے کہا کہ تخلیق کے نام پر فحاشی اور غیر مہذب زبان کا استعمال ناقابل قبول ہے۔ حکومت اس رجحان کو روکنے کے لیے سخت کارروائی کرنے سے دریغ نہیں کرے گی۔
ایک پریس کانفرنس سے خطاب کرتے ہوئے وزیر انوراگ ٹھاکر نے کہا کہ حکومت نے او ٹی ٹی پلیٹ فارموں پر نشر کیے جارہے مواد میں فحاشی اور غیر مہذب زبان کے استعمال سے جڑی شکایتوں پر سنجیدگی سے غور کیا ہے۔ انہوں نے کہا، ’ ان فورمز کو فحاشی کے لیے نہیں تخلیقی صلاحیتوں کے لیے آزادی دی گئی ہے۔
تخلیقی صلاحیتوں کے نام پر گالی گلوچ ہر گز قبول نہیں کی جاسکتی کہ کوئی حد سے تجاوز کرے۔ فحاشی اور نازیبا زبان کے استعمال کو روکنے کے لیے سخت کارروائی کی جائے گی۔اہم بات یہ ہے کہ ان دنوں او ٹی ٹی پلیٹ فارمز پر کئی طرح کی ویب سیریز اور مختصر فلمیں دیکھی جا رہی ہیں، جن میں قابل اعتراض مواد پیش کیا جا رہا ہے۔ اس سلسلے میں کئی طرح کی شکایتیں حکومت تک پہنچ رہی ہیں۔
