رملہ: (اے یو ایس )فلسطینی صدر محمود عباس نے امریکی صدر کے ساتھ اواخر ہفتہ اپنی چوٹی ملاقات کے دوران فلسطینی عوام کے ساتھ کھڑے رہنے کے جذبے اور ان سے اظہار یکجہتی کرنے پر خادم حرمین شریفین و فرمانروائے سعودی عرب شاہ سلمان بن عبدالعزیز آل سعود اور ولی عہد شہزادہ محمد بن سلمان( ایم بی ایس) سے تہہ دل سے اظہار تشکر کیا ۔فلسطینی صدر نے خادم حرمین شریفین اور ولی عہد کے نام اظہار سپاس کے لیے الگ الگ پیغامات ارسال کیے۔
انہوں نے جدہ سکیورٹی اینڈ ڈیولپمنٹ سمٹ کے دوران فلسطینی عوام کے قومی حقوق کی حمایت جاری رکھنے اور مبنی بر حق فلسطینی کاز کی تائید وحمایت کرنے نیز اسرائیل کے غاصبانہ قبضے کو ختم کرانے کا عزم ظاہر کرنے اور خودمختار فلسطینی ریاست کے قیام اور مشرقی بیت المقدس کو اس کا دارالحکومت بنوانے کی مہم جاری رکھنے پر دونوں رہنماو¿ں کا شکریہ ادا کیا۔فلسطینی صدر نے فلسطینی کاز سے متعلق غیر متزلزل موقف کے اظہار پر جدہ سربراہ کانفرنس میں شریک برادر ممالک کا بھی شکریہ ادا کیا۔
فلسطینی صدر نے شاہ سلمان کے نام پیغام میں تحریر کیا کہ ’جدہ سکیورٹی اینڈ ڈیولپمنٹ سمٹ کی کامیابی پر آپ کو دلی مبارکباد پیش کرتا ہوں۔ جس میں امریکہ، جی سی سی ممالک، مصر، اردن اور عراق شریک ہوئے‘۔فلسطینی صدر نے جدہ سربراہ کانفرنس کے نتائج اور اہم اہداف پر قدر ومنزلت کا اظہار کرتے ہوئے کہا کہ ’اس کانفرنس کی بدولت عرب دنیا میں امن و استحکام اور معیشت مضبوط ہو گی اور علاقائی و بین الاقوامی سطح پر سعودی عرب کا قائدانہ کردار آگے بڑھے گا‘۔
تصویر سوشل میڈیا