کابل:حال ہی میں ترکی سے واپس بھیجے گئے متعدد افغانوں نے ترک فوج پر انسانی حقوق کی خلاف ورزیوں اور ناروا سلوک کا الزام لگایا۔ ملک سے نکالے جانے والوں نے انقرہ میں افغانستان کے سفارت خانے کے کردار کے بارے میں شکایت کرتے ہوئے کہا کہ سفارت خانہ ملک بدری کے لیے فارم پر دستخط کر رہا ہے۔ترکی مبینہ طور پر روزانہ تقریباً 300 افغانوں کو ملک بدر کر رہا ہے۔
ایمل بھی ان افغان مہاجرین میں سے ایک ہے جنہیں ترک پولیس نے وطن بھیجا ہے۔ایمل نے کہا کہ جب پولیس ان کو پکڑتی ہے تو جامہ تلاشی لیتی ہے، وہ لڑکوں کو مارتی ہے، یہاں تک کہ وہ لڑکوں کے کپڑے بھی اتار دیتی ہے، پھر انہیں ملک بدر کر دیتی ہے۔ایک جلاوطن مجاہد نے کہا کہ افغان مہاجرین کو کیمپوں میں برے سلوک کا سامنا کرنا پڑتا ہے، وہاں نہ اچھا کھانا ہے اور نہ ہی مریضوں کے علاج کے لیے کوئی سہولت ۔ جلاوطن کیے گئے افراد نے ، جن میں سے بہت سے غربت کی وجہ سے بھاگ گئے، طلوع نیوز کو بتایا کہ وہ روزگار کی تلاش کے لیے غیر قانونی طور پر ترکی میں داخل ہوئے تھے۔
ایک جلاوطن فضل محمد نے کہا کہ افغان بڑی امیدوں کے ساتھ ایران اور ترکی جاتے ہیں، اس یقین کے ساتھ کہ یہ اسلامی ممالک ہیں، افغانوں کو اچھے سلوک اور تعاون کا سامنا کرنا پڑے گا۔ دریں اثنا، کابل ایئرپورٹ کے حکام نے بتایا کہ ترکی سے افغان مہاجرین کو لے جانے والی دو یا تین چارٹرڈ پروازیں روزانہ کی بنیاد پر ہوائی اڈے پر اترتی ہیں۔کابل ہوائی اڈے کے ایک اہلکار سید کاظم ہاشمی نے کہا کہ روزانہ، ترکی سے دو یا تین پروازیں آتی ہیں، ہر طیارے میں 130 سے 150 افراد سوار ہوتے ہیں۔طلوع نیوز نے انقرہ میں افغان سفارت خانے سے بیان حاصل کرنے کی کوشش کی لیکن سفارت خانے نے تبصرہ کرنے سے انکار کردیا۔
تصویر سوشل میڈیا