شمالی وزیرستان میں افغان دہشت گردوں کے حملے میں تین پاکستانی فوجی ہلاک

پشاور 🙁 اے ےواےس) شمالی وزیرستان کے افغان سرحد سے ملحقہ علاقے میں عسکریت پسندوں کے حملے میں تین پاکستانی فوجی ہلاک ہو گئے ہیں۔افواجِ پاکستان کے شعبہ تعلقاتِ عامہ (آئی ایس پی آر) نے حملے میں تین پاکستانی سیکیورٹی اہل کاروں کی ہلاکت کی تصدیق کی ہے۔کالعدم تحریکِ طالبان نے اس حملے کی ذمے داری قبول کی ہے۔آئی ایس پی آر کے مطابق گذشتہ روز عسکریت پسندوں نے سرحدی علاقے دیواگر میں سیکیورٹی فورسز پر فائرنگ کر دی جس کے نتیجے میں تین اہلکار ہلاک ہو گئے۔

بیان کے مطابق دہشت گردوں کو بھرپور جواب دیا گیا، تاہم اس حوالے سے مزید تفصیلات سامنے نہیں آ سکیں۔خیال رہے کہ اس حملے سے ایک روز قبل ہی وزیرِ اعظم شہباز شریف نے فوجی سربراہ ا ور دیگر اعلیٰ سول اور عسکری حکام کے ہمراہ شمالی وزیرستان کا دورہ کیا تھا۔پاکستان کا یہ موقف رہا ہے کہ افغانستان کے سرحدی علاقوں سے کالعدم تحریکِ طالبان (ٹی ٹی پی) کے دہشت گرد پاکستانی علاقوں میں گھس کر سیکیورٹی فورسز کو نشانہ بناتے ہیں، لہذٰا افغانستان میں طالبان حکومت کو انہیں روکنا چاہیے۔

چند روز قبل افغان طالبان نے پاکستان پر یہ الزام عائد کیا تھا کہ اس کے جیٹ طیاروں نے افغان علاقوں کنڑ اور خوست میں بمباری کی جس میں بچوں اور خواتین سمیت درجنوں افراد ہلاک ہو گئے تھے۔ یونیسیف نے ان حملوں میں 20 بچوں کی ہلاکت کی تصدیق کی تھی۔البتہ پاکستان کی جانب سے اس حملے کی تردید یا تصدیق نہیں کی گئی تھی۔تاہم شمالی وزیرستان میں اس تازہ کارروائی کے بعد آئی ایس پی آر کے مطابق ایک بار پھر افغان حکام سے مطالبہ کیا گیا ہے کہ وہ افغانستان کی سرزمین پاکستان کے خلاف استعمال ہونے سے روکیں۔