کابل: ( اے یو ایس )افغان پارلیمنٹ کے ایک رکن نے کہا ہے کہ ملک تیزی کے ساتھ ایک خطرناک خانہ جنگی اور کشیدگی کی طرف جا رہا ہے۔ انہوں نے حکومت اور طالبان کے درمیان بات چیت کی بحالی کی ضرورت پر زور دیتے ہوئے کہا کہ مذاکرات نہ کیے گئے تو پورا ملک خانہ جنگی اور خون خرابے کی نذر ہو جائے گا۔افغان رکن پارلیمنٹ واقف حکیمی نے العربیہ کے ساتھ ایک انٹرویو میں کہا ہے کہ طالبان نے افغان مفاہمت کے لیے کسی بھی لچک کا مظاہرہ کرنے سے انکار کر دیا ہے۔
انہوں نے واضح کیا کہ کسی بھی مفاہمت کا طالبان اور حکومت کے مابین ایک معاہدہ ہونا ضروری ہے۔ ان کا کہنا تھا کہ پارلیمنٹ کو امن اور جنگ کی قرارداد کی توثیق کرنا ہوگی۔فرانسیسی اخبار “لی مونڈے” کے ذریعہ شائع ہونے والی ایک رپورٹ میں کہا گیا ہے کہ افغانستان طالبان شدت پسندوں کے اقتدار میں آنے کے راستے پر گامزن ہے۔ اخباری رپورٹ کے مطابق طالبان توقعات سے کہیں زیادہ محاذ جنگ میں آگے بڑھ رہے ہیں۔
پیر کو یہ اطلاع دی گئی ہے کہ طالبان تحریک کے عناصر نے اپنی کوششیں ملک کے شمال پر مرکوز کی ہیں ، صوبائی دارالحکومتوں کا محاصرہ کرلیا ہے۔ 3 جولائی کو امریکی فوج کے انخلا کے بعد طالبان تیزی کے ساتھ کابل کی طرف پیش قدمی کر رہے ہیں۔
اس کے علاوہ ، رپورٹ میں ، دارالحکومت میں مشترکہ امریکی ذرائع کے حوالے سے بتایا گیا ہے کہ افغانستان میں امریکی اور نیٹو افواج کے کمانڈر جنرل سکاٹ ملر کو 4 جولائی کو ملک چھوڑنا تھا ، لیکن وہ ابھی بھی موجود ہیں۔ انہوں نے وضاحت کی کہ طالبان کی پیشرفت اور ملک میں سلامتی کے بگاڑ نے فریقین کے مابین معاملات کی تنظیم نو کا باعث بنی ہے۔
تصویر سوشل میڈیا