صنعا: ( اے یو ایس )یمن میں آئینی حکومت کے حامی عرب اتحاد نے ہفتے کی صبح ایک اعلان میں بتایا ہے کہ سعودی عرب کے شہر خمیس مشیط کی سمت بھیجا جانے والا ایک دھماکا خیز ڈرون طیارہ تباہ کر دیا گیا۔ یہ ڈرون یمن میں ایران نواز حوثی ملیشیا کی طرف سے بھیجا گیا تھا۔
عرب اتحاد نے کہا کہ یہ امر یقینی ہے کہ حوثیوں کی جانب سے ان کوششوں کو جاری رکھنے کا مقصد مملکت میں شہریوں اور شہری مقامات کو دانستہ طور پر نشانہ بنانا ہے۔ اتحاد کے مطابق شہریوں کی حفاظت اور اس خطرے سے نمٹنے کے لیے عملی اقدامات کیے جا رہے ہیں۔اس سے قبل جمعہ کی شام عرب اتحاد نے ایک میزائل حملہ کو ناکام بنانے کا اعلان کیا تھا۔
اتحاد کے مطابق حوثیوں کی جانب سے سعودی عرب کی سمت بھیجا جانے والا ایک میزائل فضا میں تباہ کر دیا گیا۔یاد رہے کہ عرب اتحاد نے چند روز قبل اعلان کیا تھا کہ سعودی عرب کے فضائی دفاعی نظام نے 48 گھنٹوں کے دوران میں 6 دھماکا خیز ڈرون اور 4 بیلسٹک میزائلوں کو تباہ کر دیا۔ ان کے ذریعے مملکت کے جنوب میں شہری مقامات کو نشانہ بنانے کی کوشش کی گئی تھی۔
