کوئٹہ:(اے یو ایس ) بلوچستان ہائی کورٹ نے حکم دیا ہے کہ پاکستان تحریک انصاف (پی ٹی آئی) کے رہنما شہباز گل کے خلاف درج مقدمہ ختم کیا جائے۔بلوچستان ہائی کورٹ میں پی ٹی آئی کے رہنما شہباز گل کے خلاف درج مقدمہ ختم کرنے سے متعلق درخواست پر سماعت کے بعد عدالت نے یہ حکم جاری کیا۔شہباز گل کیس کی پیروی انصاف لائر فورم کے سید اقبال شاہ ایڈووکیٹ، شمس رند ایڈووکیٹ اور دیگر نے کی۔شہباز گل کے خلاف بلوچستان کے ضلع قلعہ عبداللہ میں 28 نومبر کو ایف آئی آر درج کی گئی تھی، عدالت نے پولیس حکام پر برہمی کا اظہار کرتے ہوئے مقدمہ ختم کرنے کا حکم سنایا۔
شہباز گل کے خلاف اداروں کو متنازع بنانے کے حوالے سے درج مقدمے کے خاتمے کے لیے بلوچستان ہائی کورٹ میں سماعت جسٹس عبدالحمید بلوچ نے کی۔عدالت نے ریمارکس دیتے ہوئے کہا کہ ایک ہی کیس میں کیسے قلعہ عبداللہ میں مقدمہ درجہ کیا گیا، سپریم کورٹ کا حکم ہے کہ ایک واقعہ کے دو مقدمات نہیں ہوسکتے۔جج نے کہا کہ اس طرح مقدمات عدالت اور قانون کے ساتھ مذاق ہے۔ عدالت نے فیصلہ سناتے ہوئے مقدمے کو ختم کرنے کا حکم دیا۔
اس موقع پر شہباز گل کے وکیل سید اقبال شاہ ایڈووکیٹ نے کہا کہ بلوچستان ہائی کورٹ نے پاکستان میں سب سے پہلے غیر قانونی مقدمات پر فیصلہ دے کر انصاف کے تقاضے پورے کیے ہیں جس پر عدالت کے شکر گزار ہیں۔واضح رہے کہ 28 نومبر کو پی ٹی آئی رہنما شہباز گل کے خلاف اداروں کے خلاف متنازع بیانات پر بلوچستان کے ضلع قلعہ عبداللہ میں مقدمہ درج ہوا تھا۔خیال رہے کہ سابق وزیر اعظم عمران خان کے چیف آف اسٹاف شہباز گل کو نجی نیوز چینل ’اے آر وائی‘ پر متنازعہ بیان دینے کے بعد اسلام آباد پولیس نے بغاوت اور عوام کو ریاستی اداروں کے خلاف اکسانے کے الزام میں 9 اگست کو حراست میں لے کر ان کے خلاف تھانہ کوہسار پولیس نے سٹی مجسٹریٹ کی مدعیت میں مقدمہ درج کیا تھا۔
تصویر سوشل میڈیا