جزیرہ نما سینا میں داعش انتہاپسندوں کے حملے میں پانچ فوجی ہلاک

قاہرہ :(اے یو ایس ) مصر کے شورش زدہ علاقے جزیرہ نماسینا میں واقع قصبے شیخ زوید میں ایک چیک پوسٹ پر داعش کے جنگجوؤں نے ہفتہ کے روزحملہ کر دیا جس میں پانچ فوجی ہلاک اور چھ زخمی ہوگئے ہیں۔مصری حکام نے بتایا ہے کہ حملے میں زخمی فوجیوں کو بحرمتوسط کے کنارے واقع شہرالعریش میں فوجی اسپتال میں منتقل کردیا گیا ہے۔

انھوں نے مزید بتایا ہے کہ سکیورٹی اہلکاروں کی جوابی فائرنگ سے تین جنگجو ہلاک ہوگئے ہیں اور علاقے میں مزید نفری بھیج دی گئی ہے۔جزیرہ نماسینا کے شمالی حصے میں مصرکی سکیورٹی فورسز اورداعش سے وابستہ جنگجوؤں کے درمیان آئے دن جھڑپیں ہوتی رہتی ہیں۔اس علاقے میں 2013 میں مصر کے پہلے منتخب صدر مرحوم ڈاکٹر محمد مرسی کی حکومت کی برطرفی کے بعد سے شورش بپا ہے۔داعش کے جنگجوؤں نے اس علاقے میں مصری سکیورٹی فورسز،عیسائی اقلیت اور فوج اور پولیس کے ساتھ تعاون کرنے والے عام افراد پر بیسیوں حملے کیے ہیں۔

تاہم فروری 2018 میں مصری فوج کی بڑے پیمانے پر کارروائی کے بعد سے اس علاقے میں داعش کے حملوں میں کمی واقع ہوئی ہے۔مصری فوج نے سینا کے علاوہ نیل ڈیلٹا اور لیبیا کے ساتھ واقع سرحدی علاقے میں بھی جنگجوؤں کے خلاف کارروائی کی تھی۔اس میں بھاری مشینری سے ان کے ٹھکانوں کو تباہ کردیاتھا اوربڑی تعداد میں مشتبہ جنگجوؤں کو ہلاک کردیا تھا یا گرفتارکر لیا تھا۔