الیکشن ہارنے کے بعد ٹرمپ پہلی بارواشنگٹن پہنچے، امریکہ فرسٹ ایجنڈا اجلاس سے خطاب کیا

واشنگٹن: (اے یو ایس ) سابق صدر ڈونلڈ ٹرمپ وائٹ ہاوس چھوڑنے کے بعد پہلی بار منگل کو واشنگٹن واپس آئے جہاں انہوں نے اپنے اتحادی تھنک ٹینک ، امریکہ فرسٹ پالیسی انسٹی ٹیوٹ کے دوروزہ امریکہ فرسٹ ایجنڈا اجلاس سے خطاب کیا۔ ٹرمپ کے اس خطاب کو 2024کی انتخابی مہم کا ایک جزو سمجھا جا رہا ہے۔کچھ مشیروں نے انہیں مشورہ دیا ہے کہ وہ 2020 کے انتخابات کے بجائے مستقبل کے اپنے وژن کے بارے میں زیادہ بات کریں۔

ٹرمپ ممکنہ طور پر دوسری مدت کے لیے ایک ایجنڈا تیار کر رہے ہیں۔غیر منافع بخش امریکہ فرسٹ پالیسی انسٹی ٹیوٹ، ٹرمپ انتظامیہ کے سابق عہدیداروں اور اتحادیوں پر مشتمل ہے ۔ اس سربراہی اجلاس کا مقصد امریکہ فرسٹ ایجنڈے کو اجاگر کرنا ہے، جو معیشت، صحت کی دیکھ بھال اورانتخابی اصلاحات سمیت 10 اہم پالیسی شعبوں پر محیط ہے۔یہ گروپ ٹرمپ سے منسلک متعدد تنظیموں میں سے ایک ہے۔ جس نے ان کی غیر موجودگی میں اپنی پالیسیوں کو آگے بڑھانا جاری رکھا ہے۔20 جنوری 2021 کے بعد ٹرمپ پہلی بار واشنگٹن آئے ہیں۔

یاد رہے کہ صدر جو بائیڈن نے اپنے عہدے کا حلف اسی دن اٹھایا تھا۔یہ دورہ ایک ایسے وقت پر کیا گیاہے جب ان کے 2024 کے ممکنہ حریف پارٹی کے معیاری امیدوار کے طور پر ان کی حیثیت کو چیلنج کرنے کے لیے تیزی سے واضح موقف اختیار کر رہے ہیں۔ ان میں سابق نائب صدر مائیک پینس بھی شامل ہیں، جو تقریروں میں اپنا آزادی ایجنڈا بیان کرتے رہے ہیں۔پینس کو ٹرمپ کے دورے کے موقع پرواشنگٹن میں ہیریٹیج فاو¿نڈیشن میں تقریر کرنا تھی جس میں وہ یہ کہنے والے تھے کہ کچھ لوگ ماضی پر توجہ مرکوز کرنے کا انتخاب کر سکتے ہیں، لیکن میرا خیال ہے کہ قدامت پسندوں کو مستقبل پر توجہ مرکوز کرنی چاہیے۔ اگر ہم ایسا کرتے ہیں تو ہم صرف اگلا الیکشن نہیں جیتیں گے، ہم نسلوں کے لیے امریکی تاریخ کا دھارا بدل دیں گے ۔ پینس کی تقریر خراب موسم کی وجہ سے ملتوی کر دی گئی تھی ۔