کابل:امارت اسلامیہ کے ترجمان نے کہا کہ افغانستان کی سیاسی، سیکورٹی اور سماجی صورتحال پر تبادلہ خیال کرنے کے لیے عنقریب ایک اجتماع منعقد کیا جائے گا۔ امارت اسلامیہ کے ترجمان ذبیح اللہ مجاہد نے تاہم اجتماع کی تاریخ کے بارے میں تفصیلات فراہم نہیں کیں لیکن کہا کہ اس میں اسلامی اسکالرز، قبائلی عمائدین اور سیاسی شخصیات شرکت کریں گی۔
امارت اسلامیہ کے ترجمان ذبیح اللہ مجاہد نے کہا کہ ہم افغانوں کے درمیان ایک اجتماع منعقد کرنے کی کوشش کر رہے ہیں۔ جس میں قبائلی عمائدین، اسلامی علما اور بااثر شخصیات شرکت کریں گی۔ لیکن یہ طے ہونا باقی ہے کہ اس کا انعقاد کب ہوگا۔ تاہم انہوں نے کہا کہ اس اجتماع میں سیاسی، سماجی اور سیکورٹی امور کا احاطہ کیا جائے گا۔ امارت اسلامیہ کے ایک سینئر رکن انس حقانی نے کہا کہ انہیں امید ہے کہ یہ اجتماع مثبت نتائج کے ساتھ اختتام پذیر ہوگا۔
انہوں نے کہا کہ یہ امارت اسلامیہ کا مصمم عزم ہے۔ امید ہے کہ یہ اجلاس (پوری قوم کی نمائندگی کرے گا)۔ سیاسی تجزیہ کاروں نے ملاقات کے حوالے سے مختلف آرا پیش کیں۔ سیاسی تجزیہ کار سید جواد حسینی نے کہا کہ اجتماع اس وقت سود مند ہو سکتا ہے جب اس میں سیاسی شخصیات، ماہرین تعلیم، خواتین اور نوجوانوں کو بھی مدعو کر کے اسے وسیع پیمانے پر منعقد کیا جائے۔
ایک سیاسی تجزیہ کار برنا صالحی نے کہا کہ اس قسم کا اجتماع ملک کے اندر لوگوں کی توجہ مبذول کرنے کے لیے ہے تاکہ نظام کے ممکنہ خاتمے کو روکا جا سکے۔ یہ بات ایسے وقت میں سامنے آئی ہے جب قائم مقام وزیر خارجہ امیر خان متقی نے حال ہی میں قبائلی عمائدین، اسلامی علما اور سیاسی تجزیہ کاروں سے کئی ملاقاتیں کیں۔
تصویر سوشل میڈیا