نئی دہلی: سابق مس پاکستان زینب نوید امریکی ریاست میری لینڈ میں ایک کار حادثے میں ہلاک ہوگئیں۔میری لینڈ کی پولیس کی رپورٹ کے مطابق یو ٹرن لیتے ہوئے ان کی کار فٹ پاتھ سے ٹکرا کر الٹ گئی اور مخالف سمت سے آنے والی گاڑی کی زد میں آگئی۔
رپورٹ میں مزید بتایا گیا کہ 32 سالہ زینب نوید مرسڈیز گاڑی چلا رہی تھی کہ اچانک غلط یوٹرن لینے کی کوشش کے دوران ان کی گاڑی الٹ گئی اور وہ موقع پر ہی ہلاک ہوگئیں۔
واضح رہے کہ زینب نوید نے 2012 میں کینیڈا کے شہر ٹورنٹو میں منعقد ہونے والے ایوارڈز ‘مس پاکستان ورلڈ’ میں پہلی پوزیشن حاصل کی تھی۔
انہوں نے ٹورنٹو میں ہونے والے اس مقابلے میں لاہور کی نمائندگی کی تھی۔مس پاکستان ورلڈ کا مقابلہ 2003 سے ہر سال کینیڈا میں منعقد ہوتا ہے لیکن پہلی بار 2014 میں یہ مقابلہ امریکا میں منعقد ہوا۔ہر سال اس مقابلے میں پاکستانی نڑاد لڑکیاں حصہ لیتی آرہی ہیں۔ پولیس حادثہ کی تفتیش کر رہی ہے۔