نئی دہلی: ملک میں کورونا کی رفتار بتدریج کم ہوتی جارہی ہے۔ ملک میںکچھ عرصے سے کورونا کے نئے معاملات میں کمی واقع ہوئی ہے۔ ادھر ، وزارت صحت کی جانب سے ایک بیان سامنے آیا ہے کہ اب ملک میں برا وقت ٹل گیا لیکن ہمیں پھر بھی احتیاطی تدابیر اپنانا ہوگی اور لاپروائی نہیں برتنا ہے۔
مرکزی وزیر صحت ڈاکٹر ہرش وردھن نے کہا کہ اگلے سال جنوری 2021 سے کسی بھی وقت ہندوستان میں کورونا کی پہلی ویکسین دستیاب ہو جائے گی۔ ڈاکٹر ہرش وردھن نے کہا کہ ہندوستان میں مریضوں کی بازیابی کی شرح 95.46 فیصدہو گئی ہے۔
مرکزی وزارت صحت کی طرف سے جاری کردہ ایک بیان کے مطابق ، انہوں نے کہا کہ اکتوبر اور نومبر میں تہواروں کے باوجود وسیع پیمانے پر جانچ ، نگرانی اور علاج معالجے کی صحیح پالیسی کی وجہ سے معاملات میں کوئی نئی تیزی نہیں آئی ہے۔تاہم انہوں نے عوام سے اپیل کی کہ وہ کسی قسم کی لاپرواہی نہ برتیں۔ ماسک پہننا یقینی بنائیں اور سماجی دوری کا بھی خیال رکھیں۔
ڈاکٹر ہرش وردھن نے کہا کہ ہماری حکومت کو ویکسین کے معیار اور حفاظت پر کوئی سمجھوتہ نہیں کرنا چاہئے۔ انہوں نے کہا کہ میں ذاتی طور پر یہ کہہ سکتا ہوں کہ جنوری کے کسی بھی ہفتے میں ہم ہندوستانی عوام کو کورونا کی پہلی ویکسین دینے کی پوزیشن میں ہوں گے۔اسی دوران ، جب انڈین کونسل آف میڈیکل ریسرچ (آئی سی ایم آر) کے شعبہ مہاماری اور مواصلاتی امراض کے سربراہ ڈاکٹر سمیران پانڈا سے پوچھا گیا کہ ، اگر ہندوستان میں وبا کا بدترین دور گزر چکا ہے تو ، انہوں نے کہا کہ کچھ ریاستوں میں ، وبائی امراض سے متعلق اعداد و شمار میں کمی دیکھی جا رہی ہے۔
اور دوسری ریاستوں میں غیر مستحکم ہیں۔ اس پر پانڈا نے کہا کہ بیشتر ریاستوں نے اس پر موثر انداز میں قابو پا یا ہے جبکہ کچھ کو محتاط رہنے کی ضرورت ہے۔ ریاستوں کی صورتحال ایک دوسرے سے مختلف ہے۔اس سے قبل ہفتے کے روز ، مرکزی وزیر صحت ہرش وردھن نے اس بات پر زور دیا کہ پوری ہدف آبادی کو کورکرنے کے لئے فوری طور پر کووڈ 19 ویکسی نیشن مہم کی ضرورت ہے۔ ایک اندازے کے مطابق ایسی آبادی تقریباََ30 کروڑ ہے۔
تصویر سوشل میڈیا