نئی دہلی: ہندوستان ، سری لنکا اور مالدیپ کے اعلیٰ سکیورٹی حکام نے تعاون کو مزید مستحکم کرنے اور مشترکہ مفادات کے لئے امن کی فضا کو یقینی بنانے پر اتفاق کیا۔ انہوں نے ایک اعلیٰ سطحی سہ فریقی بات چیت میں خطے کی موجودہ بحری سلامتی کی صورتحال کا جائزہ لیا۔
قومی سلامتی کے مشیر (این ایس اے) اجیت ڈوبھال نے سری لنکا کے دفاعی سیکرٹری میجر جنرل (ر)کمال گنارتنے اور مالدیپ کی وزیر دفاع ماریا دیدی کے ساتھ بات چیت میں حصہ لیا۔ سری لنکا ، ہندوستان اور مالدیپ کے ساتھ سمندری سلامتی کے تعاون سے متعلق چوتھی سہ فریقی میٹنگ کا انعقاد کر رہا ہے۔ یہ ملاقات چھ سال کے بعد ہورہی ہے۔ اس سے قبل یہ میٹنگ 2014 میں نئی دہلی میں ہوئی تھی۔
سری لنکا کی وزارت دفاع کی طرف سے جاری مشترکہ بیان کے مطابق ، سمندری تحفظ سے متعلق مشترکہ امور میں بحر ہند کے خطے میں بامعنی تعاون کو فروغ دینے کے خواہاں تین ممالک نے خطے میں سمندری سلامتی کی موجودہ صورتحال کا جائزہ لیا۔ انہوں نے سمندری شعبے سے آگاہی ، انسانی امداد اور تباہی سے نمٹنے ، مشترکہ مشقوں ، صلاحیتوں کی بحالی ، سمندری تحفظ اور خطرہ ، سمندری آلودگی وغیرہ کے شعبوں میں باہمی تعاون پر تبادلہ خیال کیا۔
مشترکہ بیان میں کہا گیا ہے کہ خطے میں امن و سلامتی کو یقینی بنانے کے لئے چیلنجوں کا مقابلہ کرنے میں تعاون کو مزید مستحکم کرنے پر اتفاق کیا گیا۔ اس میں مزید کہا گیا ہے کہ تینوں ممالک نے مشترکہ سلامتی کے خطرات پر تبادلہ خیال کیا اور دہشت گردی ، تعصب ، منشیات ، اسلحہ اور انسانی اسمگلنگ ، منی لانڈرنگ ، سائبر سکیورٹی اور سمندری ماحول پر موسمیاتی تبدیلیوں کے اثرات جیسے امور کو شامل کرنے پر اتفاق کیا ہے۔
یہ میٹنگ بحر ہند بحر الکاہل اور بحر ہند میں اپنا اثر و رسوخ بڑھانے کی چین کی کوششوں کے بیچ ہوئی۔ چین بحر ہند میں اپنی بحری ریشم روڈ منصوبے کے لئے مالدیپ اور سری لنکا کو اہم سمجھتا ہے۔ سری لنکا ، ہندوستان اور مالدیپ نے 2011 میں سمندری سلامتی کے تعاون سے متعلق سہ فریقی این ایس اے سطحی اجلاس شروع کیا تھا اور اس سے قبل تین میٹنگیں ہوچکی ہیں۔ سری لنکا کی وزارت خارجہ نے ٹویٹ کیا کہ سری لنکا کے وزیر خارجہ دنیش گناوردھنے نے اجلاس سے بطور مہمان خصوصی خطاب کیا۔
سیکرٹری خارجہ ایڈمرل پروفیسر جیاناتھ کولمبس نے بھی اس میٹنگ میں شرکت کی۔ جمعہ کے روز مذاکرات کے لئے کولمبو پہنچے ڈوبھال نے مالدیپ کی وزیر دفاع ماریا دیدی سے ملاقات کی اور بحر ہند میں اہم جزیرے والے ملک کے ساتھ دوطرفہ شراکت داری کو مزید تقویت دینے کے سلسلے میں ایک خوشگوار اور تفصیلی گفتگو کی۔
تصویر سوشل میڈیا