تہران: قائم مقام وزیر خارجہ امیر خان متقی کی قیادت میں ایران کے دورے پر جانے والے امارت اسلامیہ کے ایک وفد نے ایران میں مزاحمتی محاذ کے سربراہ احمد مسعود اور صوبہ ہرات کے سابق گورنر اسماعیل خان سے ملاقات کی۔متقی نے احمد مسعود اور اسماعیل خان کے ساتھ اپنی ملاقات کی تصدیق قطر میں امارت اسلامیہ کے سیاسی دفتر کے ترجمان محمد نعیم کی طرف سے پوسٹ کی گئی ایک ویڈیو میں کی۔جس میں انہوں نے لکھا کہ ہاں، ہم نے احمد مسعود، کمانڈر اسماعیل خان اور دیگر افغانوں سے ملاقات کی۔
قائم مقام وزیر خارجہ نے ویڈیو میں کہا کہ ہم نے ان سب کو یقین دلایا کہ وہ بغیر کسی پریشانی کے ملک واپس آ سکتے ہیں اور سکون سے رہ سکتے ہیں۔ محمد نعیم نے یہ بھی کہا کہ امارت اسلامیہ کے وفد نے ایران میں احمد مسعود اور اسماعیل خان سے ملاقات کی ہے۔تہران نے بھی مذاکرات کی میزبانی کی تصدیق کرتے ہوئے کہا کہ افغان گروپوں سے اچھی بات چیت ہوئی ہے۔اگرچہ احمد مسعود کی قیادت میں مزاحمتی محاذ نے ابھی تک اس معاملے پر کوئی باضابطہ بیان نہیں دیا ہے، تاہم محاذ کے ایک رکن حافظ منصور نے ملاقات کی تصدیق کی ہے۔
دوسری جانب ذرائع نے طلوع نیوز کو تصدیق کی ہے کہ ایران میں افغان سفارت خانے کے ڈپٹی چیف آف مشن امیر اسماعیل خان کے بھتیجے عبدالقیوم سلیمانی کو قائم مقام وزیر خارجہ تعینات کیا گیا ہے۔امارت اسلامیہ کے وفد نے ہفتے کے روز ایرانی حکام سے ملاقات کے لیے تہران کا سفر کیا۔وزارت خارجہ کے نائب ترجمان حافظ ضیا احمد نے کہا کہ دورے کے دوران، دونوں فریقوں نے سیاسی، اقتصادی، راہداری اور افغان مہاجرین کے مسائل پر تبادلہ خیال کیا۔
تصویر سوشل میڈیا