نئی دہلی : بالی ووڈ اداکارسشانت سنگھ راجپوت کی ڈپریشن کے باعث خودکشی کر لینے کے واقعہ کے بعد پاکستانی اداکاروں نے بھی ڈیپریشن پر بات کرنا شروع کر دی۔
پاکستان کی نوجوان اداکارہ و ماڈل نازش جہانگیر نے اعتراف کیا ہے کہ ماضی میں سخت ذہنی دباؤ اور پریشانیوں کے باعث کم از کم انہوں نے 2 بار خودکشی کرنے کا سوچا۔
اداکارہ نازش جہانگیر نے اپنی انسٹاگرام پوسٹ میں ایک بار پھر ذہنی صحت، ڈپریشن اور نفسیاتی مسائل کے حوالے سے کھل کر بات کرتے ہوئے اعتراف کیا کہ جب ان کی والدہ کا انتقال ہوگیا تھا تو وہ اکیلی پڑگئی تھیں۔
اداکارہ کے مطابق والدہ کے گذر جانے بعد وہ نفسیاتی مسائل اور ڈپریشن کا شکار رہیں اور ان ہی مسائل کی وجہ سے انہوں نے 2 بار اپنی زندگی ختم کرنے کا بھی سوچا۔نازش جہانگیرکے مطابق 10 سال تک ڈپریشن اور نفسیاتی مسائل میں مبتلا رہنے کے بعد انہوں نے خود کو بدلنے اور اپنے خلاف جنگ لڑنے کا فیصلہ کیا اور انہوں نے اپنی طرح ڈپریشن کے شکار افراد کو تلاش کرنا اور ان سے بات کرنے کا آغاز کیا اور پھر آہستہ آہستہ ان کی ذہنی صحت بہتر ہونے لگی۔
انہوں نے اپنی پوسٹ میں مداحوں کو دوسرے لوگوں کا خیال رکھنے، دوسرے کے ذہنی مسائل کو سمجھنے اور دوسروں کے اقدامات کو پرکھنے سے گریز کرنے کی ہدایات بھی کیں۔ماضی میں بھی نازش جہانگیر ڈپریشن کا اعتراف کر چکی ہیں اور انہوں نے رواں برس فروری میں اپنی انسٹاگرام پوسٹ میں کہا تھا کہ وہ ایک دہائی تک ذہنی تناؤ، الجھن اور پریشانیوں کا مقابلہ کرتی رہیں۔
انہوں نے اپنی پوسٹ میں لکھا کہ تھا کہ ڈپریشن، تناؤ اور ذہنی الجھن نہ صرف اپنی ذات بلکہ اس کے شکار شخص کے اہل خانہ اور قریبی دوستوں کے لیے بھی تباہ کن ہے اور ایسی بیماری کا پتہ چلنے کے بعد ماہرین صحت سے رجوع کیا جانا چاہیے۔
واضح ہو کہ حال ہی میں بالی ووڈ اداکار سشانت سنگھ راجپوت نے ڈپریشن کی وجہ سے 1 جون کو اپنے ہے فلیٹ پر خودکشی کرلی تھی، وہ گزشتہ چند ماہ سے سخت ڈپریشن کا شکار تھے، ان کی اچانک خودکشی نے ہندوستانی فلم انڈسٹری کو ہلا کر ردکھ دیا۔
تصویر سوشل میڈیا