نئی دہلی: امریکہ میں ہر سال ہونے والے انٹرنیشنل ایمی ایوارڈز میں سب سے بڑا ایوارڈ نیٹ فلیکس پر جاری ہونے والی ‘گینگ ریپ’ کے جرم پر بنائی گئی ہندوستانی ویب سیریز ‘دہلی کرائم’ کو دیا گیاہے۔
یہ پہلا موقع ہے جب کسی انڈین ویب سیریز کو اتنا بڑا ایوارڈ دیا گیا ہے، اس سے قبل انڈین سیریز اور فلموں کو عالمی ایوارڈز کے لیے نامزد کیا جا چکا ہے۔
انٹرنیشنل ایمی ایوارڈز میں امریکی ریاست نیویارک کے گورنراینڈریو کوومو کو بھی خصوصی فاونڈرز ایوارڈ سے نوازا گیا۔
شوبز ویب سائٹ ہالی وڈ رپورٹر کے مطابق انٹرنیشنل اکیڈمی آف ٹیلیویڑن آرٹ اینڈ سائنسز کی جانب سے ہر سال دیے جانے والے انٹرنیشنل ایمی ایوارڈز میں مجموعی طور پر 12 کیٹیگریز میں ایوارڈز دیے گئے۔
انٹرنیشنل ایمی ایوارڈز میں ‘بہترین ڈراما سیریز’ کا ایوارڈ گزشتہ برس نیٹ فلیکس پر ریلیز ہونے والی ‘گینگ ریپ’ کی سیریز ‘دہلی کرائم’ کو دیا گیا۔
‘دہلی کرائم’ کی کہانی 2012 میں ہندوستان کی دارالحکومت نئی دہلی میں بس میں ‘گینگ ریپ’ کے بعد بدترین تشدد کا نشانہ بنائی گئی لڑکی کے گرد گھومتی ہے۔
تصویر سوشل میڈیا