شمالی کوریا رواں ماہ جوہری تجربے کی تیاری کر رہا ہے: امریکا

واشنگٹن: (اے یوایس)امریکا نے الزام عائد کیا ہے کہ شمالی کوریا رواں ماہ ممکنہ طور پر جوہری تجربہ کرنے کی تیاری کر رہا ہے۔امریکی وزارتِ خارجہ کی نائب ترجمان جلینا پورٹر نے جاری کیے گئے بیان میں کہا ہے کہ شمالی کوریا اس تجربہ کی جگہ تیار کر رہا ہے۔ان کا کہنا ہے کہ جوہری تجربے کے لیے یہ جگہ رواں ماہ تیار ہو سکتی ہے۔

امریکی وزارتِ خارجہ کی نائب ترجمان کا یہ بھی کہنا ہے کہ شمالی کوریا سے متعلق معلومات کا تبادلہ اتحادیوں کے ساتھ کیا ہے۔شمالی کوریا اس سے قبل 6 مرتبہ جوہری تجربات کر چکا ہے۔

شمالی کوریا نے آخری مرتبہ 2017 میں جوہری تجربہ کیا تھا۔دوسری جانب جنوبی کورین فوج کا کہنا ہے کہ شمالی کوریا نے آبدوز سے شارٹ رینج بیلسٹک میزائل ایس ایل بی ایم کا تجربہ کیا ہے۔جاپانی وزارتِ دفاع کا بھی کہناہے کہ شمالی کوریا نے ممکنہ طور پر ایک اور بیلسٹک میزائل کا تجربہ کیا ہے۔