میں اداکارہ ہوں، ’عصمت فروش‘ نہیں‘:ہراساں کرنے والے کو شخص کومریم نفیس کا جواب

نئی دہلی:’عشق بے نام‘ ’دیار دل ‘اور ‘کچھ نہ کہو‘ جیسے ڈراموں میں شاندار اداکاری کرنے والی پاکستان کی نامور اداکارہ مریم نفیس نے خود کو ہراساں کرنے والے شخص کو آڑے ہاتھوں لیتے ہوئے ان کے پیغامات کے اسکرین شاٹ سوشل میڈیا پر شیئر کر تے ہوئے لکھا کہ ’وہ اداکارہ ہیں، جسم فروش نہیں‘۔

مریم نفیس نے عالمی یوم خواتین کے موقع پر خود کو ہراساں کرنے والے شخص کی جانب سے واٹس ایپ پر بھجوائے گئے پیغامات کو سوشل میڈیا پر شیئر کیا۔مریم نفیس نے انسٹاگرام پر پوسٹ شیئر کرتے ہوئے لکھا کہ ’وہ اداکارہ ہیں، جسم فروش نہیں‘۔اداکارہ نے ملاقات کے نقد معاوضہکی پیش کش کرنے والے مرد کے پیغامات کا اسکرین شاٹ شیئر کرتے ہوئے انسٹاگرام پوسٹ میں بتایا کہ کس طرح ایک شخص کے پیغامات انہیں ذہنی طور پر پریشان کر رہے ہیں۔

اسکرین شاٹ شیئر کرتے ہوئے مریم نفیس نے لکھا کہ ’انجان شخص کی جانب سے ملاقات کے عوض پیسوں کی پیش کش کے پیغامات ان کی ذہنی و قلبی تکلیف پہنچا رہے ہیں اور وہ یہ سمجھنے سے قاصر ہیں کہ ایسے بیمار ذہنیت والے افراد کو ایسا کیوں لگتا ہے کہ ان کا کام ہی یہی ہے‘۔اداکارہ نے لکھا کہ انہوں نے کوشش کی کہ وہ ایسے نامناسب پیغامات کے جوابات سے منہ موڑ لیں مگر ان کے پاس ان پیغامات کے اسکرین شاٹ شیئر کرنے کے علاوہ کوئی بھی راستہ نہیں تھا۔

اداکارہ کی جانب سے شیئر کیے گئے اسکرین شاٹ میں مذکوہ شخص کی جانب سے بھیجے گئے میسیج کو واضح طور پر پڑھا جا سکتا ہے۔انگریزی میں بھیجے گئے میسیج میں اگرچہ واضح طور پر کوئی غیر اخلاقی بات نہیں کی گئی تاہم پیغامات میں اداکارہ کو ملاقات کے عوض پیسوں کی پیش کش کی گئی تھی۔

پیغامات بھیجنے والے مرد نے اپنا تعارف کرانے سمیت اداکارہ کو بتایا کہ وہ پنجاب کے دارالحکومت لاہور سے تعلق رکھتے ہیں اور اگر وہ انہیں اپنے مینیجر کا نمبر فراہم کریں تو وہ ان سے معاملات طے کرنے کو تیار ہے۔

اسکرین شاٹ میں پڑھا جا سکتا ہے کہ پیغام بھیجنے والے شخص نے اداکارہ کو بتایا کہ وہ انہیں نہیں جانتیں مگر بطور اداکارہ وہ ان سے واقف ہیں اور ان سے ملاقات کرنا چاہتے ہیں۔لاہور سے تعلق رکھنے والے شخص نے اداکارہ کو پیغام بھیجا کہ وہ ان کے ساتھ کچھ گھنٹے گزارنا چاہتا ہے اور وہ اس کے بدلے اداکارہ کو خطیر رقم بھی دینے کو تیار ہے۔

پیغام بھیجنے والے شخص نے اداکارہ کو بتایا کہ وہ ان سے کہیں بھی، کسی بھی جگہ یہاں تک کہ دوسرے ملک میں بھی ملاقات کرنے کو تیار ہے اور اس کے عوض وہ اداکارہ کو ڈھائی سے 3 لاکھ روپے تک کی رقم بھی فراہم کر سکتا ہے۔