سری نگر:(اے یوایس) جنوبی ضلع کولگام کے مرہامہ گاوں میں سلامتی دستوں اور جنگجووں کے مابین تصادم میں دو پاکستانی جنگجو مارے گئے۔آئی جی کشمیر وجے کمار نے بتایا کہ مہلوک پاکستانی ملی ٹینٹ سال 2018 سے کولگام اور شوپیاں اضلاع میں سرگرم تھے۔پولیس ذرائع نے بتایا کہ ہفتے کے روز حفاظتی عملے کو یہ اطلاع موصول ہوئی کہ ملی ٹینٹ جنوبی ضلع کولگام کے مرہامہ گاوں میں روپوش ہیں تو پولیس اور سیکورٹی فورسز نے مشترکہ طورپر فوراً ا س علاقے کا محاصرہ کر کے ان کی تلاش شروع کی۔
انہوں نے بتایا کہ جائے ماندن نہ پائے رفتن جیسی صورت حال میں خود کو گھرا ہوا اور فرار ہونے کے تمام راستے مسدود پا کر انتہاپسندوںنے سلامتی دستوں پر اندھا دھند فائرنگ شروع کی چنانچہ سلامتی عملے نے بھی پوزیشن سنبھال کر جوابی کارروائی کی۔ ترجمان کے مطابق کچھ عرصے تک جاری رہنے والی اس جھڑپ میں دو مل انتہاپسند مارے گئے جن کے قبضے سے بھاری مقدار میں اسلحہ وگولہ بارود اور قابل اعتراض مواد برآمد کرکے ضبط کیا گیا۔دریں اثنا آئی جی کشمیر وجے کمار نے بتایا کہ مرہامہ کولگام تصادم میں جیش سے وابستہ دو پاکستانی انتہاپسند مارے گئے۔
انہوں نے مہلوکین کی شناخت سلطان پٹھان اور زبیح ساکنان پاکستان کے طورپر کی ۔آئی جی کشمیر نے مزید کہا کہ دونوں سال 2018 سے شوپیاں اور کولگام بیلٹ میں سرگرم تھے اور اُن کی ہلاکت سیکورٹی ایجنسیوں کے لئے بہت بڑی کامیابی ہے۔علاوہ ازیں پولیس نے عوام سے پر زور اپیل کی ہے کہ وہ جائے تصادم پر جانے سے تب تک گریز کیا کریں جب تک اسے پوری طرح سے محفوظ قرار نہ دے دیا جائے کیونکہ پولیس اور دیگر سلامتی ادارے لوگوں کے جان و مال کی محافظ ہے لہذا لوگوں کی قیمتی جانوں کو بچانے کیلئے پولیس ہر ممکن کوشش کرتی ہے۔
تصویر سوشل میڈیا