نئی دہلی: معروف ہندوستانی ٹینس اسٹار ثانیہ مرزا کی بہن انعم مرزا کا اسد کے ساتھ رشتہ گزشتہ کئی مہینوں سے زیر بحث کاموضوع تھا۔گذشتہ شب حیدرآباد میں انعم مرزا اور اسدالدین ازدواجی زندگی میں منسلک ہو گئے۔ اسد مشہور کرکٹر محمد اظہرالدین کے صابزادے ہیں۔
انعم نے انسٹاگرام پر اپنی شادی کی کچھ تصاویر شیئر کرکے اس خبر کی تصدیق کی ہے۔ سوشل میڈیا پر لوگ انعم اور اسد کی شادی کی تصاویر کو کافی پسند کر رہے ہیں۔ انعم دلہن کے روپ میں بہت خوبصورت نظر آ رہی ہیں۔ اس موقع پر انہوں نے روایتی گلابی رنگ کا لباس زیب تن کیا ، جبکہ اسد نے بادامی رنگ کی شیروانی پہن کر محفل میں چار چاند لگا دئے۔
تصویر شیئر کرتے وقت انعم نے کیپشن میں لکھا ، ”مسٹر اینڈ مسز! الحمد اللہ فار ایوری تھِنگ۔“بتایا جا رہا ہے کہ انعم اور اسد ایک دوسرے سے کافی دنوں سے ملاقات کررہے تھے اور انہوں نے محبت کی شادی کی ہے۔ ثانیہ مرزا بھی کئی مرتبہ اپنی بہن انعم اور اسد کے تعلقات کے بارے میں بات کر چکی ہیں۔ اسد کو ایک طوعل عرصے سے اس لمحے کا انتظار تھا اور جب یہ لمحہ آیا تو اسد نے بھی یہ خوشخبری کو انسٹاگرام پر پوسٹ کر کے سب کو سنائی۔
دولہا اسد نے تصویر کے کیپشن میں لکھا ، ”آخرکار میں نے اپنی محبت سے شادی کرلی۔“اس مبارک موقع پر ثانیہ مرزا نے بھی اپنی کچھ تصاویر سوشل میڈیا پر شیئر کی ہیں۔واضح رہے کہ انعم پیشہ کے اعتبار سے فیشن کیوریٹر اور اسٹائلسٹ ہیں اور والد اظہرالدین کے گوا کو پری سیزن کیمپ ٹیم میں مشیر مقرر کئے جانے کے بعد اسد کو ٹیم کا حصہ بنایا گیا ہے۔
اسد وجے ہزارے ٹرافی میں نہیں کھیلے لیکن ان کا نام رنجی ٹیم میں شامل تھا۔ فرسٹ کلاس کرکٹ میں اپنے ڈیبیو سے قبل اسد 2009 میں حیدرآباد کرکٹ ایسوسی ایشن کولٹس الیون کے لئے کے معین الدولہ گولڈ کپ میں کھیلے تھے۔
(تصویریں انسٹا گرام)