سعودی فضائیہ کی پاکستان و امریکی ائر فورس کے ساتھ مشترکہ مشقیں شروع

ریاض:(اے یوایس )سعودی فضائیہ نے امریکی و پاکستانی فضائیہ کے ساتھ مشترکہ فوجی مشق شروع کر دی۔ان کثیر الملکی مشقوں کا آغاز پاکستان ایئر فورس کے مصحف ایئر بیس پر ہوا۔ بحرین، مصر اور اردن کی فضائی افواج کو بطور مبصر ان مشقوں میں شرکت کی دعوت دی گئی ہے۔افتتاحی تقریب کے مہمان خصوصی ڈپٹی چیف آف ایئر سٹاف ایئر وائس مارشل وقاص احمد سلہری تھے۔

شرکا سے خطاب کرتے ہوئے انہوں نے کہا کہ بین الاقوامی مشقیں اس عسکری مشق کے شرکا یا ایئر پاور سینٹر آف ایکسیلنس کے لیے نئی نہیں ہیں۔ایئر وائس مارشل وقاص احمد سلہری نے مشقوں کے حوالے سے کہا کہ ’ایسز میٹ مشقیں اس لیے منفرد ہیں کیونکہ ان مشقوں میں حصہ لینے والی فضائی افواج بذات خود آپریشنل سرگرمیوں میں مصروف رہی ہیں اور جنگی کارروائیوں، خواہ وہ دہشت گردی کی خلاف ہوں یا فضائی میدان میں ہوں، کا وسیع تجربہ رکھتی ہیں۔‘’اس پلیٹ فارم کو باہمی مفادات کے حصول اور شرکا کے تجربات سے استفادہ حاصل کرنے کے لیے استعمال کیا جانا چاہیے۔‘

اردن اور سعودی عرب کے دفاعی اتاشیوں اور امریکہ کے ایئر اتاشی نے بھی افتتاحی تقریب میں شرکت کی۔یہ مشقیں 10اپریل تک جاری رہیں گی۔ اس مشق سے منصوبہ بندی اور جنگی شعبے میں تجربے اور مہارت کا تبادلہ اور فضائی حملوں میں مدد بہم پہنچانا مقصود ہے۔