ریاض:(اے یو ایس)سعودی عرب کی حکومت نے امریکا کی ایران کو جوہری ہتھیاروں کے حصول سے روکنے کی کوششوں کی حمایت کا اظہار کیا ہے۔منگل کے روز ہونے والے سعودی کابینہ کے اجلاس کے بعد جاری کردہ ایک بیان میں کہاگیا ہے کہ حکومت نے یمن کی ایران کی حمایت یافتہ حوثی ملیشیا کے حملوں کے خلاف اپنی سرزمین کے دفاع کی حمایت کرنے پرامریکا کا شکریہ ادا کیا ہے۔
کابینہ کے اراکین نے سعودی عرب کے دفاعی تقاضوں اور ضرورتوں کو پورا کرنے اور سعودی عرب کی سرزمین اور اس کے شہریوں کے دفا ع میں مملکت کی حمایت کے لیے امریکہ کے عزم کا اظہار کرنے پر امریی صدر جو بائیڈن کی ستائش کی۔
واضح رہے کہ آسٹریا کے دارالحکومت ویانا میں ایران اور عالمی طاقتوں کے درمیان ایک نئے جوہری معاہدے کے لیے گذشتہ سال اپریل سے بات چیت جاری ہے جبکہ مغربی ممالک ان خدشات کا اظہار کررہے ہیں کہ ایران اپنے جوہری پروگرام کو آگے بڑھارہاہے اور جب تک کوئی سمجھوتا نہیں طے پاجاتا ہے،اس وقت تک وہ جوہری پروگرام میں ناقابل تغیّر پیش رفت کرلے گا۔
تصویر سوشل میڈیا