سری نگر:(اے یوایس) انجمن اوقاف جامع مسجد سری نگر نے تاریخی جامع مسجد میں نماز جمعہ کی ادائیگی پر مسلسل پابندی پر تشویش اظہار کرتے ہوئے کہا کہ اس طرح مسلمانوں کے مذہبی جذبات و احساسات کو مجروح کرنے کی کوشش کی جا رہی ہے۔انجمن کے ایک ترجمان نے جمعے کے روز اپنے ایک بیان میں کہا: ’29ویں جمعتہ المبارک کومسلسل مرکزی جامع مسجد سری نگر میں مسلمانان کشمیر کو نماز جمعہ جیسے اہم فریضہ کی ادائیگی سے روک کرحکام نے اپنی تانا شاہی اور آمریت کا مظاہرہ کیا ہے جو حد درجہ افسوسناک اور قابل مذمت ہے۔
بیان میں کہا گیا ہے کہ کشمیر کی سب سے بڑی عبادتگاہ میں جو روحانیت کا عظیم مرکز اور اسلامی درس و تدریس کا منبع ہے آخرکیوں روکا جارہا ہے؟موصوف ترجمان نے اپنے بیان میں کہا کہ حکام کے اس طرز عمل سے نہ صرف مسلمانوں کے دینی جذبات مسلسل مجروح ہو رہے ہیں بلکہ صدیوں پر محیط جامع مسجد کے منبر و محراب سے قال اللہ وقال الرسول ﷺ کے ساتھ انسانیت، محبت اور ہم آہنگی کے پیغام کو عام کرنے کا جو عمل جاری تھا اسے معطل کیا گیا ہے۔
انجمن نے توقع ظاہر کی کہ حرمت والا مہینہ رجب المرجب کے آخری عشرے میں جس میں معراج نبویﷺ کی تار یخ بھی آرہی ہے نہ صرف مرکزی جامع مسجد کو نماز جمعہ کی ادائیگی کیلئے کھول دیا جائیگابلکہ سربراہ اوقاف جناب میرواعظ ڈاکٹر مولوی محمد عمر فاروق جنہیں گزشتہ ڈھائی سال سے لگاتار نظر بند رکھا گیا ہے کی رہائی عمل میں لائی جائیگی تاکہ موصوف دین اسلام کی تبلیغ اور ترویج کے ساتھ ساتھ اصلاح معاشرہ کا اپنا منصبی اور ملی فریضہ انجام دے سکیں۔
تصویر سوشل میڈیا