نئی دہلی، (اے یوایس) سپریم کورٹ نے 2002 میں گجرات کے گودھرا میں سابرمتی ایکسپریس کو آگ لگانے والے آٹھ مجرموں کو ضمانت دے دی ہے۔ عمر قید کی سزا کاٹ رہے ان لوگوں کو عدالت سے راحت ملی ہے۔ ان تمام مجرموں کو 17 سے 20 سال کی سزا سنائی گئی ہے۔ ساتھ ہی سپریم کورٹ نے چار دیگر مجرموں کو ضمانت دینے سے انکار کر دیا۔ انہیں نچلی عدالت نے موت کی سزا سنائی تھی، لیکن بعد میں ہائی کورٹ نے اسے عمر قید میں تبدیل کر دیا تھا۔سپریم کورٹ میں چیف جسٹس ڈی وائی چندر چوڑ اور جسٹس پی ایس نرسمہا کی بنچ نے گودھرا کیس کے قصورواروں کی ضمانت کے معاملے پر فیصلہ کیا۔ ضمانت حاصل کرنے والے 8 مجرم عمر قید کی سزا کاٹ رہے ہیں، عدالت نے کہا کہ ضمانت کی شرائط پوری کرنے کے بعد باقی کو ضمانت پر رہا کیا جائے۔
قصورواروں کے وکیل سنجے ہیگڑے نے عید کے پیش نظر انہیں ضمانت پر رہا کرنے کی اپیل کی۔سپریم کورٹ نے عبدالرحمان دھنتیا، عبدالستار ابراہیم گدی سمیت 27 مجرموں کی جانب سے دائر ضمانت کی درخواست پر سماعت کی، جو 2002 میں گودھرا سابرمتی ایکسپریس ٹرین کو زندہ جلانے کے معاملے میں عمر قید کی سزا کاٹ رہے ہیں جس میں 59 افراد کو زندہ جلا دیا گیا تھا۔گجرات حکومت کی جانب سے سالیسٹر جنرل تشار مہتا نے عدالت کو بتایا کہ یہ صرف پتھراؤ کا معاملہ نہیں ہے۔
مجرموں نے سابرمتی ایکسپریس کی بوگی کو بند کردیا تھا جس میں 59 مسافر ہلاک اور سینکڑوں زخمی ہوئے تھے۔ تشار مہتا نے عدالت کو بتایا کہ کچھ لوگ کہہ رہے ہیں کہ ان کا کردار صرف پتھر بازی کا تھا، لیکن جب آپ ایک بوگی کو باہر سے بند کرتے ہیں، اسے آگ لگا دیتے ہیں اور پھر پتھراؤ کرتے ہیں، یہ صرف پتھر بازی نہیں ہے۔گزشتہ سماعت میں سپریم کورٹ نے کہا تھا کہ ان مجرموں کی ضمانت پر غور نہیں کیا جائے گا، جنہیں نچلی عدالت نے موت کی سزا سنائی تھی، لیکن ہائی کورٹ نے انہیں عمر قید میں تبدیل کر دیا تھا۔ تاہم سپریم کورٹ نے کینسر کے باعث ایک ملزم کی اہلیہ کی عبوری ضمانت کی مدت میں توسیع کردی تھی۔
تصویر سوشل میڈیا