جموں:سابق ہندوستانی کرکٹر سریش رینانے کہا ہے کہ ملک کی 15 برس تک نمائندگی کرنے کے بعد میں اب جموں و کشمیر کے لئے کچھ کرنا چاہتا ہوں۔ انہوں نے کہا کہ جموں و کشمیر میں ٹیلنٹ کی کوئی کمی نہیں ہے جس کو نکھارنا میرا خواب ہے۔
موصوف نے ان باتوں کا اظہار منگل کے روز یہاں یوتھ سروسز اینڈ سپورٹس کے سکریٹری سرمد حفیظ کے ہمراہ منعقدہ ایک مشترکہ پریس کانفرنس سے خطاب کے دوران کیا ہے۔
پریس کانفرنس سے قبل لیفٹیننٹ گورنر منوج سنہا کی موجودگی میں سریش رینہ کرکٹ اکیڈیمی اور جموں و کشمیر ا سپورٹس کونسل کے درمیان ایک مفاہمتی یادداشت پر دستخط ہوئے۔ اس موقع پر چیف سکریٹری بی وی آر سبرامنیم اور لیفٹیننٹ گورنر کے پرنسپل سکریٹری نتیشور کمار بھی موجود تھے۔ مسٹر رینانے کہا کہ ملک کے لئے 15 برس کھیلنے کے بعد میں جموں و کشمیر کے لئے کچھ کرنا چاہتا ہوں۔
ان کا کہنا تھا: ‘ملک کے لئے15 برس کھیلا ہوں اب جموں و کشمیر کے لئے کچھ کرنا چاہتا ہوں، یہاں کے کھلاڑیوں میں کافی ٹیلنٹ ہے جیسا کہ حال ہی میں یہاں کے ایک کھلاڑی نے آئی پی ایل کے میچوں میں اپنی صلاحیتوں کا مظاہرہ کیا، ہم چاہتے ہیں کہ زیادہ سے زیادہ بچے آئیں تاکہ ان کی صلاحیتوں کو نکھارا جاسکے’۔ موصوف سابق کرکٹر نے کہا کہ یہ میرا خواب ہے کہ جموں وکشمیر کے بچے آگے بڑھیں اور ملک کی نمائندگی کریں۔
انہوں نے کہا کہ میں جی لگا کر محنت کر کے یہاں کے کھلاڑیوں کی صلاحیتوں کو نکھاروں گا تاکہ اگلے چند برسوں کے دوران آئی پی ایل میں جموں وکشمیر کی خود کی ایک ٹیم ہو۔ سریش رینانے کہا کہ یہاں تمام سہولیات دستیاب ہیں میں چاہتا ہوں کہ اگلے10-15 برسوں میں جموں و کشمیر کے کھلاڑی ملک کی نمائندگی کر سکیں جو ہمارے لئے خوشی کی بات ہوگی۔ انہوں نے کہا کہ ہم نے سری نگر اور جموں میں 3-3 کھیل کے میدان چنے ہیں دھیرے دھیرے تربیتی سیشنز کا انعقاد ہوگا جس میں کھلاڑی حصہ لیں گے۔ نے ایک سوال کے جواب میں کہا: ‘جو بچے نشے میں ڈوب گئے ہیں اگر وہ اپنی فٹنس کی طرف توجہ دیں گے تو وہ نشہ کرنا بھول جائیں گے، اس پر بھی کام ہوگا’۔
انہوں نے کہا کہ میرے والد سری نگر سے ہیں میری کوشش ہے کہ پہلے جموں و کشمیر کے کھلاڑی جموں و کشمیر کے لئے کھیلیں، رنجی کھیلیں اور پھر ملک کی نمائندگی کریں اور پھر آئی پی ایل جیسے بڑے ٹورنامنٹس کا بھی سوچیں۔خواتین کھلاڑیوں کے بارے میں پوچھے جانے پر رینا نے کہا کہ ان کے تحفظ کو یقینی بنانے کے بعد ایک خاتون کوچ کو بھی لائیں گے جو یہاں خواتین کھلاڑیوں کی صلاحیتوں کو نکھارنے میں مدد کرے گی۔ انہوں نے کہا کہ لیفٹیننٹ گورنر منوج سنہا ہماری اس پہل میں بھر پور تعاون فراہم کر رہے ہیں۔
اس موقع پرسرمد حفیظ نے ایک سوال کا جواب دیتے ہوئے کہا کہ یہ ابھی شروعات ہی ہے کرکٹ کے علاوہ سپورٹس کے باقی شعبوں میں بھی ایسے ہی اقدام کئے جائیں گے۔ انہوں نے کہا کہ سریش رینا، جن کا تعلق ہمارے جموں و کشمیر سے ہی ہے، مخلصانہ طور پر یہاں کے کھلاڑیوں کی صلاحیتوں کو نکھارنے کے آرزو مند ہیں۔
موصوف نے کہا کہ سریش رینا ایک بین الاقوامی سطح کے کھلاڑی رہے ہیں اور انہوں نے کئی بیرونی ممالک میں کھیلا ہے اس طرح ہمارے کھلاڑیوں کو اتنے بڑے کوچ کے ساتھ کام کرنے کا موقع نصیب ہوگا۔ انہوں نے کہا کہ مقامی کھلاڑی، جنہوں نے رنجی میں کھیلا ہے، بھی اپنی اپنی سطح پر کام کر رہے ہیںموں-
تصویر سوشل میڈیا