نیویارک،(اے یوایس) ترکیہ کے صدر رجب طیب اردوان نے اقوام متحدہ میں پاکستان اور ہندوستان کو مذاکرات کی تجویز پیش کی ہے، ان کا کہنا تھا کہ جنوبی ایشیا میں علاقائی امن و استحکام اور خوش حالی کے لیے کشمیر میں امن ناگزیر ہے۔
تفصیلات کے مطابق اقوام متحدہ کی جنرل اسمبلی کے اٹھتر ویں اجلاس سے خطاب کرتے ہوئے ترک صدر نے کہا کہ ترکیہ نے ہمیشہ ہر عالمی فورم پر کشمیر کا معاملہ اٹھایا ہے۔انھوں نے کشمیر کے پرامن حل کے لیے پاکستان اور ہندوستان کے درمیان مذاکرات پر زور دیتے ہوئے کہا کہ ہندوستان اور پاکستان میں بات چیت سے کشمیر میں دیرپا امن لایا جا سکتا ہے۔
رجب طیب اردوان کا کہنا تھا کہ کشمیر کو حل کرنے سے علاقائی استحکام پیدا ہوگا، پاکستان اور ہندوستان بات چیت سے مسئلہ کشمیر حل کریں، ترکیہ اس سمت میں اٹھائے جانے والے اقدامات کی حمایت جاری رکھے گا۔ادھر نگراں وزیر خارجہ جلیل عباس جیلانی نے نیویارک میں ایشیا سوسائٹی کی تقریب سے خطاب کرتے ہوئے کہا ہے کہ پاکستان کشمیر سمیت تمام مسائل کے حل کے لیے پرامن مذاکرات کی حمایت کرتا ہے۔
تصویر سوشل میڈیا