رباط:(اے یوایس) مراکش کی طرف سے اسرائیل کے ساتھ سفارتی تعلقات قائم کرنے کے سرکاری اعلان کے دو ہفتے بعد ایک امریکی اسرائیلی مشترکہ وفد مراکش دورے پر ہے۔اس اعلیٰ سطحی وفد کی قیادت ڈونلڈ ٹرمپ کے داماد اور ان کے سینیئر مشیر جیرڈ کشنر اور اسرائیل کے قومی سلامتی کے امور کے مشیر مئیر بن شبات کر رہے ہیں۔ ان دونوں نے مراکش کے بادشاہ شاہ محمد ششم سے ملاقات کی۔ اس اقدام کو مراکش کے اسرائیل کے ساتھ دوطرفہ تعلقات کے قےام کے سلسلے میں کی جانے والی کوششوں کے تناظر میں دیکھا جا رہا ہے۔
بین گوریون ہوائی اڈے سے پرواز سے قبل جیرڈ کشنر نے ایک پریس کانفرنس سے خطاب کرتے ہوئے کہا، ”ہمارے پاس متعدد معاہدے ہیں، جنہیں ہم اپنے اس دورے کے دوران پایہ تکمیل تک پہچانا چاہتے ہیں۔ ہم امید کرتے ہیں کہ ہمارے اس دورے سے امن کی راہ ہموار ہوگی۔”اس موقع پر مراکش کے لیے روانہ ہونے والے وفد کے شریک قائد اور اسرائیل کے قومی سلامتی سے متعلق امور کے مشیر مئیر بن شبات نے کہا، ”ہماری نگاہوں کے سامنے تاریخ رقم ہو رہی ہے۔” یروشلم میں قائم امریکی سفارت خانے کے مطابق یہ اسرائیلی ایئر لائن ‘ال آل’ کی مراکش کے لیے پہلی براہ راست فلائٹ ہے۔
گزشتہ کچھ عرصے میں یہودی ریاست اسرائیل کو عرب ریاستوں کی طرف سے پہلی بار تسلیم کیا گیا۔ ان میں متحدہ عرب امارات، بحرین، سوڈان اور مراکش شامل ہیں۔ اسرائیل نے اگست میں متحدہ عرب امارات کے ساتھ امریکی ثالثی میں ایک معاہدے پر دستخط کیے تھے۔ یہ تاریخ ساز معاہدہ رواں سال 13 اگست کو متحدہ عرب امارات اور اسرائیل کے مابین طے پایا تھا، جس پر امریکی صدر ڈونلڈ ٹرمپ نے کہا تھا کہ دونوں ممالک باہمی تعلقات استوار کرنے پر متفق ہو گئے ہیں اور ان دونوں ریاستوں کے وفود بہت جلد سرمایہ کاری، سیاحت، براہ راست پروازوں کا سلسلہ اور سفارتکاروں کی تعیناتی جیسے اہم ترین امور سے متعلق معاہدوں پر بھی دستخط کریں گے۔
ادھر بہت سی عرب ریاستوں نے اس عزم کا اظہار کیا ہے کہ وہ اس وقت تک اسرائیل کو تسلیم نہیں کریں گی جب تک اسرائیل کا فلسطین کے ساتھ امن معاہدہ طے نہ پا جائے تاہم حالیہ دنوں میں اس خطے میں پیدا ہونے والی نئی صورتحال اور علاقائی سیاست کے نئے محرکات نے صورتحال کو بدل کر رکھ دیا ہے۔
دریں اثناء مراکش نے بھی اسرائیل کو تسلیم کرتے ہوئے اس کے ساتھ معاہدے کا اعلان کر دیا جس کا خیر مقدم کرتے ہوئے امریکی صدر ڈونلڈ ٹرمپ نے کہا کہ امریکا افریقہ کے متنازعہ مغربی صحارا کے علاقے میں مراکش کی خود مختاری کو تسلیم کر لے گا۔ یہ اقدام کئی دہائیوں پر محیط امریکا کی پالیسی میں ایک بہت بڑی تبدیلی کی حیثیت رکھتا ہے۔
واضح رہے کہ مراکش نے 1975 میں اسپین سے علیحدگی اختیار کرنے کے بعد مغربی صحارا کا اقتدار اپنے ہاتھ میں لے لیا تھا اور اس کے فاسفیٹ سے مالا مال علاقے کو اپنی عمل داری میں لینے کا دعویٰ کر دیا تھا جبکہ الجزائر کی حمایت یافتہ پولیساریو فرنٹ موومنٹ علاقے کی آزادی کی جدوجہد کر رہی ہے۔
تصویر سوشل میڈیا