تاراپور نیوکلیئر پاور اسٹیشن پر تعینات سپاہی لاپتہ

تاراپور: (اے یوایس)مہاراشٹر میں واقع پالگھر میں تاراپور نیوکلیئرپاوراسٹیشن(ٹی اے پی ایس)پر تعینات ایک 33 سالہ سی آئی ایس ایف گارڈ اپنی سروس پستول اور 30 زندہ کارتوس کے ساتھ لاپتہ ہوگیا ہے۔ تاراپور پولیس نے اس کے خلاف ایک معاملہ درج کرلیا ہے تاکہ اس کے خلاف کارروائی عمل میں لائی جاسکے۔ اس کے علاوہ پولیس نے ٹیموں کی تشکیل کی ہے اور جوان کی تلاش شروع کردی ہے۔ واقعہ کے بارے میں معلومات دیتے ہوئے عہدیداروں نے بتایا کہ یادو کالونی میں اکیلا رہتا تھا اور دوسرے ملازمین کو لگ رہا تھا کہ وہ کچھ دیر بعد واپس آجائیں گے لیکن وہ وہاں واپس نہیں آئے۔

انہوں نے کہا کہ اس کی اطلاع مقامی پولیس کو دے دی گئی ہے۔ پولیس اور مرکزی ایجنسیاں یادو کی تلاش میں ہیں۔بتایا جا رہا ہے کہ لاپتہ جوان نے ہتھیار اٹھانے کے اصول کی خلاف ورزی کی تھی۔ دراصل، جوان شفٹ شروع ہونے سے ایک گھنٹہ پہلے اپنے ہتھیار لے جاتے ہیں۔ یادو کی شفٹ رات 9 بجے سے تھی۔ لیکن وہ رات 8 بجے ہتھیار جمع کرنے کے بجائے دوپہر میں لے گیا۔ ذرائع نے تصدیق کی کہ چونکہ ایس او پی پر عمل نہیں کیا گیا، اس لیے اسلحہ کی تقسیم کو سنبھالنے والے کچھ اہلکاروں کے خلاف اندرونی انکوائری شروع کر دی گئی ہے۔ اگر ایس او پیز پر عمل کیا جاتا تو اسلحے کے رکھوالے نے یادو کی ڈیوٹی کے اوقات کو چیک کیا ہوتا تو اس واقعے سے بچا جا سکتا تھا۔