ریاض:(اے یو ایس) سعودی عرب میں کوویڈ 19 کی ایک نئی شکل سامنے آنے کے بعد احتیاطی تدابیر کے طور پر بیرون ملک آمد ورفت پر عائد عارضی پابندی ختم کرتے ہوئے فضائی سروس باقاعدہ بحال کردی۔
سعودی عرب کی وزارت داخلہ کے ایک ذریعے نے بتایا ہے کہ اتوار کو دن 11 بجے سے تمام بین الاقوامی پروازیں بحال کر دی گئی ہیں۔ اس کے ساتھ ساتھ سمندری اور بری راستوں سے بھی آمد ورفت کو بحال کر دیا گیا ہے۔سعودی وزارت داخلہ کے ایک سرکاری ذریعے نے بتایا ہے کہ مملکت کی حکومت نے متعدد ممالک میں کرونا وائرس (کوویڈ 19) کی نئی قسم کی خبروں کے درمیان احتیاطی تدابیر کے طور پر دو ہفتوں کے لیے مملکت میں پروازوں کی آمد ورفت بند کردی گئی تھی۔
یہ پابندی کرونا کی ایک نئی شکل کے سامنے آنے کے بعد 20 دسمبر 2020 کو ایک ہفتے کے لیے لگائی گئی تھی تاہم اسے مزید ایک ہفتے کے لیے بڑھا دیا گیا تھا۔ لیکن اب 3 جنوری 2021 کو دن گیارہ بجے سے یہ پابندی اٹھا دی گئی ہے۔سعودی عرب کی وزارت داخلہ کے مطابق برطانیہ، جنوبی افریقا ایسے ممالک جہاں پر کرونا کی نئی قسم سامنے آئی سے آنے والے مسافروں کو یہ یقینی بنانا ہوگا کہ وہ نئے وائرس سے متاثرہ ممالک سے کم سے کم 14 دن باہر رہے ہیں۔
اس مدت کی میعاد ختم ہونے کے بعد مسافروں کو’ پی سی آر’ کا ٹیسٹ کرانا ہوگا تاکہ مسافر کے کویڈ 19 کی نئی شکل سے متاثر نہ ہونے کی یقین دہانی کرائی جا سکے۔ناگزیر حالات اورانسانی بنیادوں پر جن افراد کو مملکت میں آنے کی اجازت دی جائے گی انہیں 14 دن تک قرنطینہ میں رہنا ہوگا۔تاہم ایسے ممالک جہاں پر کرونا کی نئی شکل سامنے نہیں آئی ہے وہاں سے آنے والے مسافروں کو 7 دن تک احتیاطی تدابیر کے تحت الگ تھلگ رہنا ہوگا۔
تصویر سوشل میڈیا