صنعا :(اے یو ایس)تاخیر سے موصول اطلاع کے مطابق یمن میں آئینی حکومت کے دفاع کے لیے قائم عرب اتحادی فوج نے بدھ کے روز بحر احمر میں حوثی باغیوں کی دہشت گردی کے مقاصد کے لیے بھیجی گئی دو بمبار کشتیاں تباہ کر کے دہشت گردی کی سازش ناکام بنا دی۔
رپورٹ کے مطابق عرب اتحادی فوج کے ترجمان کرنل ترکی المالکی نے بتایا کہ حوثی باغیوں نے دو بمبار کشتیوں کے ذریعے خطے میں دہشت گردی کی ایک نئی سازش تیار کی تھی تاہم اتحادی فوج نے بروقت کارروائی کر کے دونوں کشتیوں کو تباہ کر دیا۔
ترجمان نے بتایا کہ دونوں بمبار کشتیوں کو یمن کے ساحلی شہر الحدیدہ سے روانہ کیا گیا تھا۔ایک سوال کے جواب میں المالکی نے کہا کہ حوثیوں کی طرف سے بحر احمر میں عالمی تجارتی قافلوں اور بین الاقوامی امن کو تباہ کرنے دانستہ سازشیں کی جا رہی ہیں۔
بمبار کشتیوں کے ذریعے دہشت گردی کی کوشش بھی انہی سازشوں کا حصہ ہے۔کرنل ترکی المالکی نے بتایا کہ حوثی ملیشیا نے الحدیدہ شہر کو بیلسٹک میزائلوں، ڈرون طیاروں اور بمبار کشیتوں کے ذریعے خطے کا امن تباہ کرنے کی سازشیں شروع کررکھی ہیں اور وہ الحدیدہ کو اپنے دہشت گردانہ مقاصد کے لیے استعمال کررہے ہیں۔
ان کا کہنا تھا کہ بمبار کشتیوں اور ڈرون طیاروںکے ذریعے حملوں کی کوشش اقوام متحدہ کے زیرنگرانی یمن میں جنگ بندی کے حوالے سے اسٹاک ہوم میں طےپانے والے معاہدے کی کھلی خلاف ورزی ہیں۔دریں اثنا یمن میں آئینی حکومت نے عرب اتحادی فوج کی معاونت سے ملک میں مختلف محاذوں پر حوثی ملیشیا کے خلاف کارروائی کے دوران شدت پسند گروپ کو بھاری جانی اور مالی نقصان سے دوچار کیا ہے۔
رپورٹ کے مطابق حکومتی فورسز اور اس کی معاون مزاحمتی فورسز نے مشرقی صنعا میں نھم اور مغربی مارب میں المخدرہ کے محاذوں پر حملوں میں کم سے کم 23 حوثی جنگجووں کو ہلاک کر دیا ہے۔یمنی حکومت کی طرف سے جاری کردہ بیان میں کہا گیا ہے حوثیوں کے خلاف آپریشن میں عرب اتحادی فوج اور مقامی مزاحمت کاروں کی بھی مدد حاصل تھی۔
المخدرہ کے محاذ پر آئینی فوج نے گھات لگاکر حوثیوں کے کانوائے پر حملہ کیا جس کے نتیجے میں کم سے کم 23 جنگجو ہلاک اور درجنوں زخمی ہو گئے۔ادھر مشرقی صنعا میں نھم کے محاذ پر لڑائی میں حوثیوں کی تین گاڑیوں اور اسلحہ اور گولہ بارود کی بھاری مقدار تباہ کر دی گئی۔
تصویر سوشل میڈیا