نئی دہلی(اے یو ایس ) دہلی کے سیریل کلر اور ریپسٹ رویندر کمار کے خلاف روہنی کورٹ کا بڑا فیصلہ آیا ہے۔ عدالت نے اس معاملے میں مجرم رویندر کمار کو عمر قید کی سزا سنائی ہے۔ ملزم رویندر کو روہنی عدالت نے 6 مئی کو مجرم قرار دیا تھا۔ رویندر پر الزام ہے کہ سال 2008 سے 2015 تک اس نے 30 بچوں کے ساتھ گھناؤنے واقعہ کو انجام دیا اور پھر ان کا قتل کردیا۔ اسی کیس میں سے ایک میں اسے عمر قید کی سزا سنائی گئی ہے۔دراصل 14 جولائی 2015 کو دہلی کے بیگم پور علاقے کی جین کالونی سے چھ سالہ بچی کو اغوا کیا گیا تھا۔
چار دن بعد پولیس کو لڑکی کی لاش علاقے کی ایک خالی عمارت سے ملی۔ لڑکی کو زیادتی کے بعد قتل کر دیا گیا۔ پولیس نے کرائم سین کی چھان بین کی تو پتہ چلا کہ وہاں ڈرائیونگ لائسنس اور کچھ دیگر دستاویزات موجود ہیں۔ ڈرائیونگ لائسنس سنی کے نام پر تھا، پولیس نے سنی کی تلاش شروع کی تو پتہ چلا کہ وہ اسپتال میں داخل ہے۔پولیس نے سنی سے پوچھ گچھ کی تو معلوم ہوا کہ کچھ دن قبل کنجھ والا کے علاقے میں اس کے دوست رویندر نے اپنے دو ساتھیوں کے ساتھ مل کر سنی کو مارا پیٹا تھا اور اس کی موٹر سائیکل، پرس اور رقم چھین لی تھی۔
سنی کا ڈرائیونگ لائسنس اسی پرس میں تھا، جسے رویندر نے جان بوجھ کر بیگم پور میں چھوڑ دیا تھا، جس کی وجہ سے سنی پر بچی کے قتل اور ریپ کا الزام تھا۔ سنی سے پوچھ گچھ کی بنیاد پر پولیس ملزم رویندر تک پہنچ گئی۔رویندر جو پیشہ سے بس کنڈکٹر ہے، بدایوں اور علی گڑھ میں کئی وارداتیں کرنے کے بعد دہلی آیا اور پھر دہلی-این سی آر میں کئی وارداتوں کو انجام دیا۔ پولیس کے ذریعہ رویندر سے پوچھ گچھ میں جو کچھ بھی سامنے آیا وہ چونکا دینے والا ہے۔
علی گڑھ کے رہنے والے رویندرا نے بتایا کہ وہ 2009 سے ایسی وارداتیں کر رہا ہے اور یہ واردات دہلی، ہریانہ اور یوپی میں ہو چکی ہے۔پولیس کا کہنا تھا کہ ملزمان نے 15 بچوں کو نشانہ بنایا اور ان سب کے ساتھ زیادتی/ بدتمیزی کی۔ اس نے 11 بچوں کو قتل کرنے کا اعتراف کیا ہے۔ وہ بچوں کو چاکلیٹ یا پیسے دینے کے بہانے بلاتا تھا اور پھر ان کے ساتھ بدتمیزی کرتا تھا اور پھر انہیں مار دیتا تھا۔
تصویر سوشل میڈیا