ہم پر چاہے ایٹم بم گرا دیا جائے ؛لڑکیوں کی اعلیٰ تعلیم سے متعلق فیصلے سے پیچھے نہیں ہٹیں گے: طالبان

کابل:(اے یو ایس ) طالبان کی اعلیٰ تعلیم کی وزیر ندا محمد ندیم نے لڑکیوں کے اعلیٰ تعلیم تک رسائی پر پابندی عائد کرنے کے فیصلہ پر بین الاقوامی تنقید کا جواب دیتے ہوئے کہا کہ ان کی حکومت لڑکیوں کی تعلیم تک رسائی کے بارے میں اپنا ذہن نہیں بدلے گی “چاہے وہ ہم پر ایٹم بم ہی کیوں نہ گرادیں۔ انہوں نے مزید کہا کہ ہم بین الاقوامی برادری کی جانب سے عائد کی جانے والی پابندیوں کے لیے تیار ہیں ۔واضح ہو کہ لڑکیوں کی یونیورسٹی تک رسائی پر پابندی عائد کرنے میں طالبان کے ہائرایجوکیشن اعلیٰ تعلیم کے وزیر ندا محمد ندیم کا ہی ذہن کارفرما ہے۔انہوں نے دو ٹوک لہجہ میں کہا کہ اگر وہ ہم پر ایٹم بم گراتے ہیں تو بھی ہم خواتین کے لیے یونیورسٹی کی تعلیم کو روکنے کے فیصلے سے پیچھے نہیں ہٹیں گے ۔ ندیم نے یہ بات افغانستان میں اقوام متحدہ کے مشن کے قائم مقام سربراہ میز الکبروف کی طالبان کے اعلیٰ رہنماؤں سے ملاقات کے بعد کہی۔انہوں نے طالبان رہنماؤں سے یہ ملاقاتیں اس لیے کیں تاکہ وہ امدادی ایجنسیوں کے لیے کام کرنے والی تمام خواتین پر پابندی ہٹانے پر آمادہ کر سکیں۔

رمیز الکبروف نے کابل میں طالبان کے وزیر اقتصادیات دین محمد حنیف سے ملاقات کی اور انہیں بتایا کہ لاکھوں افغانوں کو انسانی امداد کی ضرورت ہے اور رکاوٹوں کو ہٹانا بہت ضروری ہے ۔قبل ازیںالعربیہ ڈاٹ نیٹ کے مطابق یورپی یونین کے خارجہ پالیسی کے اہلکار جوزپ بوریل نے اتوار کو افغانستان میں خواتین کو مقامی اور بین الاقوامی غیر سرکاری تنظیموں میں کام کرنے سے روکنے کے طالبان کے فیصلے کی مذمت کی۔بوریل نے ایک بیان میں کہا کہ یورپی یونین، انسانی امداد اور افغان عوام کی بنیادی ضروریات کے سب سے بڑے فراہم کنندگان میں سے ایک کے طور پر، بین الاقوامی انسانی قوانین اور اصولوں کا احترام کرنے کے اپنے عزم کے تحت طالبان سے فوری طور پر اپنا فیصلہ واپس لینے کا مطالبہ کرتی ہے۔ .بیان میں مزید کہا گیا ہے کہ یورپی یونین اس فیصلے کے افغان عوام کو امداد جاری رکھنے پر پڑنے والے اثرات کا جائزہ لے گی۔مزید برآں 3 غیر ملکی امدادی تنظیموں نے اتوار کو اعلان کیا کہ وہ افغانستان میں اپنا کام معطل کر دیں گی، طالبان کی جانب سے تمام غیر سرکاری تنظیموں کو حکم دیا گیا کہ وہ اپنی خواتین ملازمین کو کام کرنے سے روک دیں۔

سیو دی چلڈرن، نارویجین ریفیوجی کونسل اور کیئر کی طرف سے جاری مشترکہ بیان میں کہا گیا ہے کہ طالبا ن کےاعلان کی وضاحت تک ہم اپنے پروگرام معطل کردیں گے۔ ہم افغانستان سے مردوں اور خواتین کیلئے یکساں طور پر اپنی جان بچانے والی امداد فراہم کرنے کو کہتے رہیں گے۔ہفتے کے روز طالبان نے افغانستان میں غیر سرکاری تنظیموں کو احکامات جاری کیے تھے کہ وہ خواتین کو ملازمت دینے سے روک دیں، تاہم طالبان نے غیر ملکی خواتین کارکن کے حوالے سے اپنے ہدایت کی وضاحت نہیں کی تھی۔افغان طالبان نے حجاب سمیت خواتین ملازمین کے لیے مناسب ڈریس کوڈ پر عمل نہ کرنے کے فیصلے کو جواز بنایا اور فیصلے پر عمل درآمد نہ کرنے والی تنظیموں کے لائسنس معطل کرنے کی دھمکی دی۔ طالبان کے اس اقدام کی عالمی برادری کی جانب سے مذمت کی گئی اور اس فیصلے سے امداد کی فراہمی پر منفی اثرات مرتب ہونے کا خدشہ ظاہر کیا گیا۔ عالمی برادری نے کہا کہ طالبان کا یہ فیصلہ ملک میں خواتین کی آزادی اور حقوق کو محدود کے ضمن میں آتا ہے۔