نئی دہلی: کانگریس لیڈروں کی جانب سے سابق وزیر اعلیٰ کیپٹن امریندر سنگھ کے خلاف سیاسی بغاوت کے بعد پنجاب پولیس کے ڈی جی پی کے عہدے سے ہٹا ئے گئے پنجاب کیڈر کے آئی پی ایس افسر دنکر گپتانے نیشنل انویسٹی گیشن ایجنسی (این آئی اے) کے نئے سربراہ کے طور پر چارج سنبھال لیا۔ وہ این آئی اے کی سربراہی کرنے والے پہلے ریاستی افسر بن گئے ہیں۔ وہ اس وقت پنجاب پولیس ہاو¿سنگ کارپوریشن کی قیادت کر رہے تھے جو کہ کوئی فعال عہدہ نہیں ہے۔
گپتا، سیاسی وجوہات کی بنا پر پنجاب میں سب سے زیادہ چیلنجنگ کام کے لیے تیار ہیں، جو کشمیر میں تازہ ٹارگٹ کلنگ کے پس منظر میں آتا ہے۔ اس کے علاوہ ملک میں بالخصوص پنجاب میں دہشت گرد، گینگسٹرز اور نارکو اسمگلرز عروج پر ہیں۔دنکر گپتا پنجاب میں انٹیلی جنس پر مبنی انسداد دہشت گردی کی کارروائیوں کے لیے جانے جاتے ہیں۔ انہوں نے 50 سے زیادہ دہشت گردی کے ماڈیولز کو تباہ کرنے کے لیے ٹیکنالوجی پر مبنی کارروائیوں کی قیادت کی ہے۔ گپتا نے فروری 2019 سے اکتوبر 2021 تک ڈی جی پی پنجاب کے طور پر خدمات انجام دیں۔ ان کے دور میں نامور گینگسٹرز کا خاتمہ کیا گیا۔ ڈی جی پی کے طور پر تعینات ہونے سے پہلے، گپتا ڈی جی پی، انٹیلی جنس، پنجاب کے طور پر تعینات رہے، جس میں پنجاب اسٹیٹ انٹیلی جنس ونگ کی براہ راست نگرانی شامل تھی۔ انہوں نے ریاست کے انسداد دہشت گردی اسکواڈ اور آرگنائزڈ کرائم کنٹرول یونٹ کی سربراہی بھی کی۔
انہوں نے جون 2004 سے جولائی 2012 تک مرکزی ڈیپوٹیشن پر وزارت داخلہ ( ایم ایچ اے)کے ساتھ آٹھ سال کا کام کیا، جس میں انہوں نے ایم ایچ اے کے ممتاز سیکورٹی ڈویڑن کی سربراہی جیسی کئی حساس ذمہ داریاں انجام دیں۔انہوں نے پنجاب میں عسکریت پسندی کے مرحلے کے دوران 7 سال سے زائد عرصے تک لدھیانہ، جالندھر اور ہوشیار پور اضلاع کے سینئر سپرنٹنڈنٹ آف پولیس (ڈسٹرکٹ پولیس چیف)کے طور پر خدمات انجام دیں۔ انہوں نے 2004 تک ڈی آئی جی (جالندھر رینج)، ڈی آئی جی (لدھیانہ رینج))، ڈی آئی جی (کاو¿نٹر انٹیلی جنس) پنجاب اور ڈی آئی جی(انٹیلی جنس) پنجاب کے طور پر بھی خدمات انجام دیں۔
انہیں 1992 میں پولیس میڈل فار گیلنٹری اور 1994 میں بار ٹو پولیس میڈل فار گیلنٹری سے نوازا گیا۔ انہیں صدر مملکت کی جانب سے پولیس میڈل برائے شاندار خدمات اور 2011 میں صدارتی پولیس تمغہ برائے امتیازی خدمات سے بھی نوازا جا چکا ہے۔ وہ 2000-01 میں جارج واشنگٹن یونیورسٹی، واشنگٹن ڈی سی (USA) اور امریکن یونیورسٹی، واشنگٹن ڈی سی میں وزٹنگ پروفیسر رہ چکے ہیں۔پنجاب میں ڈی جی پی کے طور پر کام کرتے ہوئے دنکر گپتا نے اپنی بیوی وینی مہاجن کے ماتحت بھی کام کیا۔ وینی مہاجن کو کیپٹن امریندر سنگھ کی حکومت نے ریاست کا چیف سکریٹری مقرر کیا تھا۔ یہ وہ وقت بھی تھا جب پنجاب کے اہم ترین عہدوں کی ذمہ داریاں میاں بیوی دونوں کے کاندھوں پر تھیں۔
تصویر سوشل میڈیا