ماسکو: (اے یو ایس ) روس کی وزارت دفاع نے دعویٰ کیا کہ روسی فورسز نے یوکرین کے لئے امریکا اور یورپی یونین کی جانب سے اینٹی ٹینک اور فضائی دفاع کے میزائل سسٹم سے بھرے گودام کو تباہ کر دیا ہے۔روس کی سرکاری خبر رساں ایجنسی ٹی اے ایس ایس کے مطابق روسی وزارت دفاع کے ترجمان میجر جنرل ایگور کوناشنکوو نے بتایا کہ یوکرین کے علاقے ترنوپل میں ایک گودام کو کلیبر کروز میزائل کی مدد سے نشانہ بنایا گیا۔
کوناشنکوو کے مطابق ٹرنوپل میں نشانہ بنائے جانے والے گودام میں میں امریکا اور یورپی ممالک کی جانب سے فراہم کیا جانے والا اسلحہ بالخصوص اینٹی ٹینک میزائل سسٹم، اینٹی ائیرکرافٹ میزائل اور ان کے گولے شامل تھے۔
یوکرین پر روس کی جارحیت کے آغاز سے اب امریکا اور اس کے یورپی اتحادیوں نے یوکرین کی سیکڑوں ملین ڈالرز کی فوجی امداد دی جا چکی ہے جن میں ڈرونز، گولہ بارود، اینٹی ٹینک اور فضائی دفاع کے انتظام شامل ہیں۔گذشتہ ہفتے کے دوران روسی صدر ولادیمیر پوتن نے امریکا کو خبردار کیا تھا کہ مغرب کی جانب سے یوکرین کو دور تک مار کرنے والے میزائل فراہم کرنے کی صورت میں ان میزائلوں کی کھیپ کو نشانہ بنایا جائے گا۔
تصویر سوشل میڈیا